Македонија

Николоски на министерски состанок за Планот за раст – Олеснета трговија со ЕУ

Олеснување на трговијата помеѓу земјите од Западен Балкан и Европската унија и поедноставени и побрзи постапки за плаќањата се конкретните активности на кои работат двете страни во рамки на Планот за раст на Западен Балкан.

Станува збор за активности коишто директно не инкорпорираат во европскиот пазар. Со забрзување на протокот на стоки до големиот европски пазар и олеснување на плаќањата за компаниите не прави еднакви со земјите од ЕУ. Ова го порача заменик-министерот за финансии Филип Николоски кој учествуваше на министерскиот состанок посветен на Планот за раст на Западен Балкан во Котор.

„Денеска имаме можност да разговараме за конкретни активности во рамки на Планот за раст на Западен Балкан и нашето приближување до ЕУ. Олеснувањето на трговијата и поедноставени постапки во плаќањата, што се теми на денешниот состанок, се чекори коишто не прават дел од големото европско семејство. Македонија веќе врши подготовки за пристапување во СЕПА регионот што значи отстранување на пазарните бариери со земјите од ЕУ, подигнување на кредибилитетот на финансискиот сектор на меѓународната сцена, продлабочување на трговските односи со европскиот економски регион, поедноставни, побрзи и поевтини услуги за граѓаните и компаниите. Од друга страна преку зелените коридори се обезбедува непречен проток на стоки меѓу регионот и ЕУ и намалување на времето чекање на граничните премини. Тоа се клучните елементи за нашето економско поврзување со ЕУ“, рече Николоски.

Имено, олеснувањето на трговијата ќе се постигне преку проширување на зелените коридори на граничните премини помеѓу Западен Балкан и ЕУ, а олеснувањето на плаќањата ќе се обезбеди со пристапот на земјата во СЕПА регионот.

Македонија веќе има изразено подготвеност да ги исполни критериумите за пристапување во СЕПА регионот. Министерството за финансии и Народната банка работеа на подготовка на апликацијата, и нацрт верзијата е веќе поднесена на крајот април 2024 година и се очекува финалната апликација да се достави во предвидениот рок на крајот на јуни 2024 година.

Станува збор, како што рече заменик-министерот за финансии, за мерки коишто ќе овозможат земјите од регионот пред да станат полноправни членки на ЕУ да ги уживаат придобивките од заедничкиот пазар, чиј потенцијал ќе го поттикне економскиот раст и развој и ќе придонесе за забрзана економска конвергенција на Западен Балкан кон ЕУ.

„Планот за раст како алатка е особено значајна и треба сите земји да вложат максимални напори да ја искористат оваа подадена рака за да се изоди патот до ЕУ побрзо и да се ползуваат придобивките од тоа членство поскоро. Нема друга алтернатива и за Македонија и за останатите земји од Западен Балкан и од тој пат не треба да отстапиме. Тоа е за подобро утре на сите граѓани од Западен Балкан и заштита од негативни влијание што ги создаваат кризите, како војната во Украина и тензиите на Блискиот Исток“, рече заменик-министерот Николоски, кој истакна дека националната Реформска агенда е веќе подготвена. Во ЕУ е усвоена регулативата за формирање на механизмот за реформи и раст на Западен Балкан и се отвора целосно патот за пристап до финансиската поддршка за спроведување на реформите во износ од 6 милијарди евра за целиот регион, а за земјава околу 850 милиони евра.

Министерскиот состанок во Котор се одржува во рамки на регионалниот самит на лидери на под мотото „Еден регион, заедничка визија“, на кој ќе учествува премиерот Талат Џафери.

Одделение за односи со јавност

Македонија

Скопјани порано од очекуваното добиваат вода

150те работници на Водовод ја изведоа најголемата операција во последниве неколку децении

Од два по полноќ на дожд и минусни температури, до доцна попладне... 150те работници на Водовод распоредени во неколку екипи, наместо за предвидените 15 часа само за санација, ја изведоа најголемата операција во последниве неколку децении, уште од времето на Југославија, за само 5 часа...

Од ископувања на дупки од повеќе од три метри, до супштање во истите како и во шахтите покрај огромните цевки кои требаше да се санираат, работниците велат дека на сите локации морале да работат точно како часовник за успешно да се изведе потфатот...

Најмногу главоболки велат им создале дебелите челични завртки, од квалитет кој денеска не може да се пронајде, а кои „запекле“ и се монтирани уште пред шест децении..

Директорот на Водовод кој го водеше целиот план укажа дека се заменети неколку вентили кои создавале проблем, вклучително и оној поради кој граѓаните на Ѓорче Петров трпеа со години оти немаа соодветен притисок во водоснабдувањето.

Се променија пет воздушни вентили каде што имаше заробен воздух во цевководот за подобрување на водоснабдувањето, се направи поправка на два затворачи фи-700мм

Градоначалничката Арсовска, која беше присутна на терен, работниците од Водовод ги нарече херои кои во неколку часа го решиле она што требало некој да го реши пред повеќе од 10 години...

Со оваа санација која се прави еднаш на неколку децении, ќе се зголеми и количината на водата која доаѓа до домовите за околу 20 проценти, бидејќи од 100% вода која се испушта од Рашче, само 40% можеше да се користи, останата се одлеваше под површината поради дефекти на цевководите.

Фудбал

Нов пораз на Манчестер сити во Премиер лигата

Астон Вила триумфираше попладнево над Манчестер Сити со 2:1 во воведниот натпревар од 17. коло во Премиер лигата.

Головите за тимот од Бирмингем ги постигнаа Џон Дуран во првото и Морган Роџерс во второто полувреме, додека почесниот гол за Сити го постигна Фил Фоден во судиското продолжение.

За актуелниот англиски првак ова беше деветти пораз на последните 12 натпревари.

Составот на Пеп Гвардиола е шестопласиран на табелата со 27 бодови, девет помалку од лидерот Ливерпул.

Македонија

Вински салон во Неготино

Вински салон по шести пат се реализира денеска во организација на Здружението Македонски семејни винарии, со поддршка на Министерството за земјоделство, шумарство и водостопанство, овојпат во Неготино.

Присутните имаат можност да дегустираат македонски вина и ракии произведени од 41 винарија и 10 дестилерии.

Горан Јаковлевски, претседател на „Македонски семејни винарии", рече дека производите што се дегустираат денеска, се имаат закитено со многубројни награди.

Александар Клинчаров, претседател на Македонски дестилерии, потсети исто така за докажаниот квалитет на македонските вина и ракии.

Министерот за земјоделство, шумарство и водостопанство Цветан Трипуновски, изрази задоволство од настанот.

- Во наредната 2025 година продолжуваме заедно со уште поголема поддршка, да го развиваме винскиот сектор, подвлече министерот.

Изненадување и ексклузивитет на настанот беше настапот на амбасадорот на Јапонија, Казуја Оцука и неговата сопруга, најавени како вљубеници во нашата земја, кои пред присутните се претставија со музичка изведба на македонската песна „Елено моме".

Неготинскиот градоначалник, Горан Стојанов рече дека винариите и дестилериите квалитетот на сопственото производство го потврдија со добивањето на признанието „македонски квалитет" од страна на Сојузот на стопански комори и претседателката Гордана Силјановска Давкова.

Во своето обраќање, тој истакна дека локалната самоуправа давала и ќе дава поддршка на винариите и дестилериите од општината. Стојанов нагласи дека е горд, што голем број од учесниците на денешниот вински салон, се токму од неготинската општина.

Во рамките на винскиот салон, може да се купат производите од грозје што се дегустираат на настанот.

Благодарници за особен придонес за развојот на малите семејни винарии и македонските дестилерии беа доделени на Сојузот на стопански комори и енологот Елена Богева.

- Голема чест е да се добие оваа плакета. Посакувам уште поголем успех на малите семејни винарии, да се развиваат уште повеќе и да бидат уште попрепознатливи надвор од Македонија, порача Богева.