Доколку во Влада влезе коалицијата „Вреди“, тоа ќе ги разгневи сите Албанци кои ценат дека нивните гласови ќе бидат ништовни и потоа ќе бараат дополнителен механизам за заштита- ова е ставот на потпретседателот на ДУИ Бујар Османи за владина коалиција без нив. Во „Само интервју“ на Канал 5 рече дека Европскиот фронт ја претставувал мнозинската волја на Албанците, а другиот блок кој добил помалку гласови на изборите биле нелегитимни и тоа било еднакво како Албанците воопшто да не се во Влада, па затоа нема да се помират со намерата на Мицкоски да коалицира со Вреди. Сепак, Османи, не кажа кои ќе бидат нивните следни чекори.

-ДУИ е во постојано заседание, емоциите кај албанскиот народ се веќе вжештени и ние повеќе се обидуваме да менаџираме и да контролираме…

.... Ќе сметаат дека Охридскиот рамковен договор не ги заштитува, не го заштитува нивниот глас, нивниот глас се игнорира, е ништовен за државата и дека ќе бараат дополнителен механизам за заштита. Таквото лицитирање ќе биде од еден во друг екстрем.- Бујар Османи – потпретседател на ДУИ

ДУИ коалицираа со партии од другите заедници и заедно со нив добија 50 илјади гласови повеќе, а „Вреди“ го забетонира легитимитетот на Албанците и затоа треба да се помират дека одат во опозиција, одговорија од спротивниот табор. Според коалицијата на Меџити, Касами, Гаши и Таравари, реториката на Османи за етничките прашања нема да им помогне на ДУИ.

-Знаеме дека им е тешко и се плашат па затоа почнаа „да плачат“ предвреме ама тоа е тоа, треба да се помират со судбината дека после 22 години на власт треба да одат во опозиција. Срушија се што имаа пред себе за овие 22 години и затоа на сите им стана доста од нив. Со тоа што се закануваат по стабилноста на државата, алудирајќи на меѓуетнички конфликти, тоа може да им донесе лошо само на самите нив. Затоа ги советуваме како луѓе кои се долго во опозиција, да внимаваат која реторика ја употребуваат, затоа што никој веќе не им се плаши. - Коалиција „Вреди“

Во меѓувреме продолжуваат преговорите на ВМРО-ДПМНЕ и „Вреди“ на ниво на работни групи, а очекувањата се договор за влада да има уште на почетокот на јуни. Шпекулациите дека едно од главните барања на албанската коалиција е позицијата претседател на Собранието, лидерот на ВМРО-ДПМНЕ Мицкоски, не ги коментираше..

-Со нашите потенцијални коалициони партнери сакаме да имаме партнерски однос, никој не треба од овој процес да излезе понижен. Никој во животот не треба да е понижен од другиот. Асиметрични договори не се добри, очекуваме договорите да бидат на задоволство на двете страни коишто преговараат и договараат и ценам дека во тој дух досега се одвиваат разговорите. - Христијан Мицкоски – претседател на ВМРО-ДПМНЕ

Мицкоски вчера соопшти дека неговата коалиција „Твоја Македонија“ без другите партии самостојно веќе стигнала до 61 пратеник, но не откри кои се тројцата пратеници кои се приклучиле во нивниот табор. Тој најскоро очекува да биде консолидирана цела владина коалиција, со која верува дека ќе го надмине бројот од 80 пратеници кои формираат двотретинско мнозинство во Собрание.

По серијата навреди кон Канал 5 и директорот Иван Мирчевски, сопственикот и уредник на Цивил Медиа, Џабир Мемеди, во јавноста попознат како Дерала денеска се појави во граѓанскиот суд во својство на тужен за клевета, навреда и говор на омраза, поради статиите што ги напиша по гостувањето на владиниот советник Исмет Рамадани во „Само вистина“.

Адвокатот на Канал 5 во постапката – Даниел Ѓеорѓиевски посочи дека оние кои најмногу се прокламираат како борци за слободата на говор, најмногу истата ја злоупотребуваат и смета дека пред судот претстои лесна задача...

-Постојат писмени докази, кои се евидентирани, доставени до судот од кои што судот ќе треба да утврди повреда од одредбите на законот за граѓанска одговорност од клевета и навреда, затоа сметаме дека судот ќе има лесна задача во овој процес затоа што треба да ја изгледа емисијата да ги согледа доказите да направи сеопфатна анализа и да донесе законита одлука.

На денешното рочиште, како сведоци беа повикани и Исмет Рамадани и новинарот и водител Александар Видиновски, кој во емисијата беше обвинет дека наводно ги дискриминирал Албанците...

-После емисијата влеговме со новинарот Видиновски во една од канцелариите, каде разговаравме и ги споделивме нашите гледиштата дека не гаиме никаков национализам, ми кажа дека учел во Зефљуш Марку, јас му кажав дека сум предавал таму и сум бил директор и на крајот, по конструктивниот разговор заклучивме дека и двајцата не сме националисти. – рече Рамадани..

Од другата страна, Видиновски, уверува, дека Рамадани уште вечерта се извинил за искажаното во емисијата пред да си замине од телевизијата..

-Практично ги повтори зборовите што јас ги кажав, кажа дека после емисијата седнавме, пријателски разговаравме, утврдивме дека и двајцата не сме националисти, малку подобро се запознавме и констатираше дека немало потреба од сето она што се случи со неговото однесување во емисијата.- Александар Видиновски – сведок и новинар од Канал 5 Телевизија

Директорот на Канал 5 – Иван Мирчевски вели дека со исказот на Рамадани се потврдува причината за тужбата на телевизијата како првотужител и неговата како второтужител...

-Мислам дека со тој момент, страната која што е тужена во овој случај, Цивил Медиа или Џабир Мемеди или Џабир Дерала, да го викаме Џабир Дерала Мемеди најдобро, мислам дека со неговата изјава само се потврдија нашите наоди за нивните клевети и навреди така да останува на судот да ги цени овие денешни искази и да видиме што ќе донесе главното рочиште.

Во случајот против Џабир Дерала и „Цивил Медиа“ првотужител е Канал 5 ТВ, а второтужител е директорот Иван Мирчевски на чија сметка тужениот упати бројни навреди. Следното рочиште е закажано за 13 септември каде ќе бидат сослушани тужителите и тужениот.

Од 10 до 16 мај пријавени се 44 нови случаи на голема кашлица во државава, со зголемување од трипати споредено со претходниот седмодневен период. Заклучно со 16 мај во државава се регистрирани вкупно 597 случаи на голема кашлица, се наведува во најновиот извештај на Институтот за јавно здравје (ИЈЗ), објавен попладнево.

Во однос на географската дистрибуција, најголем дел од новите 44 случаи, пријавени се во рамките на епидемијата во Скопје - 39, па четири случаи од Куманово и еден од Прилеп. Возраста на заболените се движи од три месеци до 77 години, а најголем број случаи се од возрасната група од пет до девет години. Од новите 44 случаи, пет се хоспитализирани.

- Дистрибуцијата по пол покажува дека 283 лица се од машки пол, а 314 од женски, пишува во извештајот на ИЈЗ.

Од Институтот потсетуваат дека во тек се две епидемии, пријавени во ниво на територијата на Скопје и на Куманово.

Од 18 јануари до 16 мај, дадени се вкупно 47.982 дози вакцина што содржи компонента против голема кашлица. /МИА