Здравје

Научниците предупредуваат: Не е испитано влијанието на генетски модифицираните култури

Генетски модифицираните (ГМ) култури постојат насекаде низ светот, но нивното влијание врз животната средина не е доволно проучено.

„Поради промените што ги носат, неопходно е позначајно да се проценат долгорочните ефекти на ГМ културите врз здравјето на луѓето, биодиверзитетот, уништувањето на шумите...“, е заклучокот од истражувањето на научниците од Универзитетот во Торонто и Мисисага.

Новата студија, објавена во списанието Science, ги проучувала најчестите генетски модификации на четири видови култури - соја, пченка, памук и канола, објави Универзитетот, а пренесува EurekAlert!

Иако ГМ културите даваат повеќе плодови и носат поголем профит, тоа може да доведе до промени во земјоделските традиции и на тој начин да влијае на животната средина. На пример, земјоделците може да ја зголемат употребата на пестициди кога културите ќе станат отпорни на хербициди или штетници.

- Зголемувањето на продуктивноста на земјиштето преку повисоки приноси може да го направи земјоделското земјиште генерално попрофитабилно, што може да ја поттикне земјоделската експанзија. Меѓутоа, зголемената понуда потоа може да ги намали цените на културите, што ја намалува преобразбата на земјиштето во земјоделско земјиште на друго место. Овие промени имаат потенцијал да предизвикаат уништување на шумите, загадување, да ја зголемат емисијата на стакленички гасови и да влијаат на човековото здравје и биодиверзитетот - изјави Едвардо Соуза-Родригез, вонреден професор на Катедрата за економија на Универзитетот во Торонто и Мисисага.

- Иако постигнавме напредок во разбирањето на влијанието на ГМ културите врз нашата животна средина, има многу што се уште е непознато и мора да се проучи за да се поддржат земјоделските практики кои се подобри за животната средина - додаде Суза-Родригез.

Студијата заклучува дека се потребни повеќе истражувања за да се разберат долгорочните ефекти на ГМ културите. Собирањето подетални податоци за животната средина, особено за дивиот свет, подобро ќе го измери нивното влијание и ќе ги поддржи земјоделските практики кои промовираат одржливо земјоделство, се вели во соопштението.

Свет

Во судар на камион и патнички автобус во Бразил загинаа 22 лица

Најмалку 22 лица загинаа во судар меѓу камион и автобус утринава на автопат во југоисточната бразилска држава Минас Жераис.

Државната противпожарна заштита, чии службеници пристигнале на местото на несреќата, соопшти дека 13 лица се пренесени во болница во градот Теофило Отони. Автобусот наводно тргнал од Сао Паоло и превезувал 45 патници.

Властите соопштија дека на возилото му пукнало гума, по што возачот изгубил контрола и удрил во камион. Во автобусот се судрил и автомобил со тројца патници, но сите тројца преживеале.

Спасувачките екипи работат на местото на несреќата и продолжуваат да извлекуваат жртви, изјави претставник на противпожарната служба.

Свет

Пентагон соопшти дека е убиен еден од лидерите на „Исламска држава“

Во воздушен напад на силите на Централната команда на САД (ЦЕНТКОМ) во сириската провинција Деир ез-Зор бил убиен еден од лидерите на „Исламска држава“, јави синоќа Пентагон.

Нападот бил извршен на 19 декември во регион кој претходно бил под контрола на руски и владини сили на отстранетиот претседател Башар Асад.

Како резултат на ударот биле убиени двајца борци на ИД, вклучувајќи го и Абу Јусиф, еден од лидерите на групата.

Пентагон соопшти дека воздушниот напад е дел од задачите на Централната команда за „попречување и ослабување на напорите на терористите за планирање, организирање и извршување напади врз цивили и војници на САД, нивните сојузници и партнери“.

-Како што веќе беше кажано во активности со сојузниците и партнерите во регионот, Соединетите Американски Држави нема да дозволат ИДИЛ да ја искористи сегашната ситуација во Сирија за своја обнова, изјави командантот на ЦЕНТКОМ, генерал Мајкл Ерик Курила.

ИДИЛ значи „Исламска држава на Ирак и Левант“ и е првичното име на организацијата што подоцна беше скратено во „Исламска држава“ (ИД).

-ИДИЛ посакува да ослободи над 8.000 свои борци кои моментално се во притвор во Сирија. Ќе продолжиме активно да ги следиме овие лидери и борци, вклучувајќи ги и оние кои се обидуваат да извршуваат операции надвор од Сирија.

ИД во различни земји е означена од САД како терористичка организација.

Неделава беа извршени неколку напади на американските сили во Сирија. Во понеделникот, командата објави дека извршила прецизни воздушни напади врз кампови на ИД, при што биле убиени 12 борци.

Од администрацијата на Бајден укажаа дека американската војска во Сирија останува и по падот на режимот на Асад, како дел од мисијата за борба со тероризмот и целосно уништување на ИД.

Македонија

МВР: Претреси во Тетово и тетовско, пронајдени над 75 000 парчиња пиротехника

Полициски службеници од СВР Тетово со судска наредба денеска во периодот од 9:30 до 14:20 часот извршиле претреси на повеќе локации во Тетово и тетовско, при што пронајдени над 75 000 парчиња пиротехника.

- Денеска во периодот од 09.30 до 14.20 часот полициски службеници од СВР Тетово со судска наредба извршиле претреси во дом и други простории кај Б.А.(40) во с. Селце, тетовско, како и во дом и други простории кај М.Д. (43) од с. Селце и продавница, како и во три импровизирани тезги во Тетово сопственост на С.М.(35) и М.А.(54) двајцата од Тетово и Ј.Н.(56) од с.Буковиќ, скопско. При претресите се пронајдени 75 889 парчиња пиротехнички средства и 346 килограми тутун, информираат од МВР.

Лицата, информираат од МВР, се лишени од слобода и против нив ќе бидат поднесени соодветни пријави.