Во Њу Џерси, скромниот споменик покрај океанот што една жена го подигнала во чест на нејзиниот покоен брат, охрабри илјадници други, додека во Лос Анџелес, проектот на средно училиште вклучува стотици имиња од целиот свет.
Сузан Бренан Фирстенберг од Вашингтон, купила повеќе од 630.000 бели знамиња во јуни, за сите Американци кои подлегнале на вирусот, за да ги постави на привремен споменик на Националната улица во Вашингтон.
Мислела дека ќе биде повеќе од доволно, но згрешила. До моментот кога инсталацијата е отворена, на 17 септември, повеќе од 670.000 Американци починале бидејќи делта сојот на вирусот предизвика нов смртоносен бран. На крајот од двонеделната изложба, бројот на починати надмина 700.000.
Фирстенберг била зачудена од тоа како реагирале странците и се поистоветиле со болката покажана на уметничката инсталација која заврши на 3 октомври. „Бев воодушевена од подготвеноста на луѓето да ја споделат својата тага и подготвеноста на другите да ја почитуваат“, рече таа.
Уметничката претходно поставила речиси 270.000 бели знамиња пред стадионот РФК во Вашингтон минатиот октомври, што го претставуваше бројот на Американците кои починале во тоа време.
Во јануари, Рима Саман го напишала името на нејзиниот брат Рами на камен што го поставила на плажата во нејзиниот роден град Белмар, Њу Џерси. Таа го опкружила каменот со школки наредени во форма на срце.
Импровизираниот споменик брзо се зголемил откако Саман ги поканила другите преку онлајн група на сличен начин да се потсетуваат на своите најблиски,починати од Ковид.
До јуни, имало повеќе од 3.000 камчиња во десетина срца исцртани со жолто обоени школки.
Саман и другите волонтери решиле да го зачуваат споменикот бидејќи се наоѓал на јавна плажа и бил изложен на временските неприлики.
Тие внимателно ги расклопиле аранжманите и ги поставиле во витрини и сега се централен дел на споменикот, отворен во септември, кој им оддава почит на повеќе од 4.000 жртви на вирусот.
Во Лос Анџелес, тинејџерката Медлин Фугејт почнала да прави крпеница во мај 2020 година како дел од проект за седмо одделение.
Инспирирана од Спомен-крпеницата за СИДА, на која работела нејзината мајка во 1980-тите, 13-годишната девојка ги охрабрила семејствата во нејзиниот роден Лос Анџелес да ѝ испратат парчиња ткаенина што ги претставуваат нивните изгубени најблиски и да ги сошијат заедно.
Спомен-крпеницата пораснала толку многу што покрива речиси дваесет панели и вклучува околу 600 сеќавања на поединци или групи, како што се повеќе од 20 жртви на вирусот во Нов Зеланд.
Поголемиот дел од него моментално се наоѓа во Вест Палм Бич, Флорида, а помали делови се наоѓаат во постојаната изложба на Калифорнискиот научен центар во Лос Анџелес и во Меѓународниот музеј на крпеница во Линколн, Небраска.
Фугејт сака еден ден да види официјален национален споменик на жртвите на Ковид-19, можеби дури и национален ден на сеќавање.