Еден пример е Tesla, односно моделот Y, кој моментално го држи главниот товар на електрификацијата во Европа. Во текот на првите 10 месеци овој модел е продаден во дури 183.799 примероци, поточно на пазарите на ЕУ, земјите од ЕФТА и Велика Британија. Сепак, тоа не значи дека Model Y е најпродаваниот европски модел. „Само“ е на второто место.
Статусот на најпродаван модел во Европа се уште го држи Dacia Sandero, дознава Automotive News. Еден од најевтините модели на европскиот пазар е исто така меѓу најпопуларните. Во првите десет месеци оствари минимално подобар резултат од Тесла во Европа, но сепак е подобар. Sandero достигна продажба од 184.088 единици.
На трето место е Volkswagen T-Roc со 164.833 примероци, а на четврто е поранешниот европски бестселер Peugeot 208 со продадени 163.672 примероци. Топ 5 го заокружи Renault Clio со 154.493 продадени примероци оваа година.
Ако ги погледнеме резултатите за октомври, ситуацијата е следна. Во октомври најпродаван модел повторно беше Sandero со 21.139 регистрации, а потоа Renault Clio со 14.534 новорегистрирани примероци.
Моделот Y на Tesla падна на 24 место со 9.660 регистрации. Сепак, треба да се каже дека оваа година Tesla ја зголеми продажбата на овој модел во Европа за дури 142 отсто, од минатогодишните 75.854 на споменатите 183.799 единици. Единствен модел со приближно ваков раст беше кинескиот MG ZS со годишен раст на продажбата од 107,7 отсто.