Живот

Најбезбедни и најздрави се локалните прехранбени продукти, порачуваат експертите

Она што е проблем кога се работи за храната кај нас е што има многу производители, од мали до многу големи по обем.

Експерти по безбедност на храна, лекари, професори, претставници на референтни институции, истражувачки центри за храна од целиот свет учествуваат во работата на мултидисциплинарниот конгрес на тема „Квалитет и безбедност на храна, здравје и нутриционизам" што по шести пат се одржува во Охрид.

На собирот се дискутираат најновите аспекти за состојбите во медицината, нутриционизмот, технологијата и во инженерството, вклучувајќи го и производството на машини за прехранбената индустрија, токму на темата за квалитет и безбедност на она што го јадеме.

Самите експерти по оваа тематика согласни дека прашањето колку е безбедна храната во нашата земја е комплексно, зависи од многу фактори…

– Она што е проблем кога се работи за храната кај нас е што има многу производители, од мали до многу големи по обем. Практично е невозможно надлежната Агенција за контрола на храната да земе примероци и да ги провери сите производи, тоа се огромни трошоци. Затоа се земаат мостри по случаен избор, некаде околку два проценти од севкупната понуда, но колку е тоа доволно за да се извлече заклучок дали храната е безбедна. Единствениот и најдобар начин потрошувачите да дознаат каква храна консумираат е сами да се информираат, и тоа не преку фејсбук, туку преку стручни лица и релевантни институции, изјави проф. Владимир Какуринов.

Тој во оваа прилика ги нагласи позитивните аспекти на консумирањето локална храна, преферирањето прехранбени производи од ова подрачје, од повеќе причини. Се работи за незагадени производи и додаде оти тие се најсоодветни на веќе создадената микрофлора во самиот организам.

– И претседателот на Светската нутриционистичка организација токму тоа го нагласи, граѓаните во Република Северна Македонија да јадат храна произведена тука, карактеристична за ова поднебје. Да се избегнуваат помодарски навики на консумирање продукти, на пример, свежа или сушена морска риба, морски плодови, кога се знае дека Македонија не излегува на море и оттаму нашата цревна флора не е навикната на таква храна, истакна Какуринов.

Џенгис Јашар, доктор по патологија кој го презентираше својот научен труд за улогата на бактериите во цревната флора во развојот на карцином на дебело црево, посочи предупредувачки статистички податоци, на зголемена појава на тој вид болест во земјата. Параметрите покажуваат зголемување на бројот на пациенти со малигни заболувања, конкретно на дебелото црево, што е последица на повеќе фактори, од нездрави животни навики, но секако и од несоодветна исхрана. Наспроти периодот од пред дваесеттина години кога годишно биле регистрирани до 150 пациенти со дијагностициран карцином на дебело црево, сега тој број достига околу 500 случаи на годишно ниво.

– Генетски модифицираната храна има свој удел во тоа, оттаму што доведува до интеракција со бактериската флора кај локалното население, препознавајќи ја како несоодветна…Ние сме поднебје што е дефинирано како автохтоно, според начинот на кој ја произведува храната, со формиран одреден микробиом во организмот кој знае како да го процесира храната. Се што е ново, модифицирано, што не припаѓа на ова поднебје, нашиот организам ќе го прими поинаку, рече тој, притоа согласувајќи се со генералната препорака на нутриционистите оти најдобра заштита од несакани последици предизвикани од употреба неавтохтони продукти е производство и консумирање храна од локално производство.

Свет

Ужас во Аризона: Татко си ги пронашол двете тригодишни близначки удавени во базен

Полицијата ги објави имињата на близначките кои трагично загинаа откако нивниот татко ги извлекол нивните безживотни тела од базенот во дворот.

Тригодишните девојчиња, Валентина и Пеналапи Руиз, починале во четвртокот во болница во Феникс, Аризона, соопштија официјални лица, пишува Daily Mail..

„Прелиминарните информации сугерираат дека дошло до случајно давење“, соопшти вчера полицијата.

„Во овој момент, нема ништо што откриле иследниците што изгледа сомнително“, рече пожарникарот на Феникс, Роб Мекдејд, за таткото на близнаците кој се јавил на 911.

Мекдејд додаде дека децата биле под вода „неодредено време“ пред да пристигне помошта околу 15:30 часот во четвртокот.

Девојчињата биле итно пренесени во блиската болница каде што биле прогласени за мртви, соопштија официјални лица.

Воздушните снимки од домот покажале базен во облик на бубрег што немал ограда околу него.

Свет

Расте бројот на жртвите во поплавите во Бразил- најмалку 57 загинати, 67 исчезнати (ВИДЕО)

Бројот на загинати од поројниот дожд во јужната бразилска држава Рио Гранде до Сул се искачи на 57, соопштија локалните власти, додека десетици се уште не се пронајдени, пренесува Ројтерс.

Цивилната заштита на Рио Гранде до Сул соопшти дека 67 лица се уште се водат како исчезнати, додека повеќе од 32.000 луѓе се раселени поради невремето, кое зафати речиси две третини од 497-те градови во државата, која граничи со Уругвај и Аргентина.

Поплавите уништија патишта и мостови во повеќе региони во земјата. Невремето предизвика и лизгање на земјиштето и делумно уривање на брана во мала хидроцентрала. Друга брана во градот Бенто Гонкалвес исто така е во опасност од уривање, соопштија властите.

Во Порто Алегре, главниот град на Рио Гранде до Сул, езерото Гуаиба се излеа, поплавувајќи ги улиците. Меѓународниот аеродром во Порто Алегре ги укина сите летови на неодредено време.

Во следните 36 часа се очекуваат врнежи од дожд во северните и североисточните предели на државата, но количината на врнежи се намалува и би требало да биде далеку под врвот забележан претходно оваа недела, соопшти државната метеоролошка служба.

Сепак, „нивото на водата во реките треба да остане високо неколку дена“, изјави денеска гувернерот Едуардо Леите во видеото на неговите социјални мрежи, додавајќи дека е тешко да се каже колку долго.

Рио Гранде до Сул се наоѓа на географската точка меѓу тропската и поларната атмосфера, што создава метеоролошка шема со периоди на интензивен дожд и други со суша.

Локалните научници веруваат дека оваа шема се интензивира поради климатските промени.

Обилните дождови веќе го погодија Рио Гранде до Сул во септември минатата година, кога екстратропски циклон предизвика поплави во кои загинаа повеќе од 50 луѓе. Ова се случи по повеќе од две години постојана суша поради феноменот Ла Ниња, со само слаби дождови.

Шоу биз

Најбогатата актерка на светот има 3 милијарди долари, но ретко кој ја знае (ВИДЕО)

Кога ќе помислите на најбогатите актерки во светот, веројатно ви паѓаат на ум познати имиња како Џулија Робертс, Сандра Булок, Анџелина Џоли или Џенифер Анистон, но големи се шансите никогаш да не сте го чуле името на најбогатата актерка на светот.

Имено, оваа титула ѝ припаѓа на американската актерка Џејми Герц, чие богатство се проценува на 3,2 милијарди долари. Ако се прашувате која е, не сте единствените затоа што изгледа дека луѓето не можат да се сетат на неа.

58-годишната ѕвезда ја започнала својата кариера во 1981 година со улога во „Бескрајна љубов“ и оттогаш се појавила во голем број филмови, вклучувајќи ги „Изгубените момчиња“, „Твистер“, „Крстопат“, „Помалку од нула“, „Квиксилвер“ и „Шеснаесет свеќи“.

Покрај тоа, таа се појави во хит сериите Seinfeld, The Neighbors, Modern Family и This is Us, а неодамна глумеше во филмот „I Want You Back“ од 2022 година, но таа ретко се појавува на екранот.

Сепак, нејзиното богатство не се должи само на нејзината актерска кариера. Актерката е во брак со милијардерот и инвеститор Тони Реслер, со кого е косопственик на НБА тимот Атланта Хокс. Имаат четири деца, а интересно, кога се венчале во 80-тите, Џејми била хранителка бидејќи компанијата на нејзиниот сопруг пропаднала, но тој подоцна се опоравил и заработил милијарди.

Инаку, официјално најбогатата актерка на светот е холивудската ѕвезда Дина Мерил, чие богатство се проценува на 5 милијарди долари. Мерил починала во 2017 година, со што Џејми сега стана најбогатата жива актерка на светот.