Македонија

Надлежните со апел да се внимава со палење огнови на отворено за првомајските празници

Страотините слики од пламените јазици, опустошените шуми и битките со пожарите во изминативе неколку години се уште се во свежо сеќавање, а неретко причината за тоа беше и човечки фактор.

На два дена до традиционалните првомајски собири на излетничките места во природа се вклучи алармот кај институциите за внимателност, бидејќи во спротивно може да се предизвика сериозна животна опасност и материјална штета. Од ЦУК апелираат да се следат препораките за превенција, оган да се пали на дозволени места, а несовесните кои ќе ги заобиколат апелите, барем соодветно да го изгаснат огнот..

-Кога се пали оган во природа, дури и во метална скара, жарот кој се истура или останува после скарата, треба добро да се изгасне, бидејќи откако ќе си заминат излетниците, тоа може да биде фатално во случај да се појави ветер и да ја потфати сувата вегетација.- Илија Бојаровски – Центар за управување со кризи

Казните во однос на опасноста која постои од палењето на оган се несоодветни, вели првиот човек на ДЗС – Беким Максути. Бара целокупен пристап од институциите, бидејќи покренатите кривични дела за опожарување кои нанеле милионски штети на крајот завршиле со казна од 250 евра, доделена од судските органи...

-Сакам да апелирам дека, некој што може да запали оган и што може да предизвика штета од милионски суми, на крајот да заврши со казна од 250 евра мислам дека нема ни логи, нема ни човечност нема ни државност во сето тоа, значи треба да бидеме поригорозни, по стриктни по однос на овие работи.- Беким Максути – Директор на дирекција за заштита и спасување

Како и секоја година, полицијата заедно со национални шуми и овие првомајски празници ќе бидат на терен за превенција да дојде до несакани последици...

-Апелираме до граѓаните да не се палат огнови на отворено, затоа што може да биде предизвикан пожар кој може да има тешки последици, како за здравјето на граѓаните, така и за животната средина.- МВР

Како што се наближува летото и горештините, така се наближува и опасноста од евентуални пожари. Од Ер-Тракторите на ДЗС во моментов подготвен за акција е само еден, додека останатите два, еден по друг ќе се испраќаат на 45 дневна поправка. Проблем се и пилотите, ќе мора да се реактивираат двајца веќе пензионирани, додека се обучат нови, а тоа би започнало по изборите според законот. Што се однесува до останатата опрема за борба со пожари велат дека има недостатоци, но дека таа контиунуирано се подобрува.

Култура

Објавена книгата „Блаже Конески – македонски тестамент“ на Свето Стаменов

Од печат излезе книгата „Блаже Конески – македонски тестамент“ на политиколог, новинар и публицист Свето Стаменов.

Книгата е своевидна збирка на радио-разговори реализирани на брановите на Македонското радио – Радио Скопје во чест на стогодишнината од раѓањето на Блаже Конески – основоположник на современата македонска култура.

На 590 страници Б-5 формат објавени се 37 интервјуа со истакнати македонски и странски универзитетски професори, лингвисти, слависти и македонисти – врвни познавачи на животните и творечки врвици на Блаже Конески, од кои 28 беа реализирани во текот на 2021 година – Годината во чест на Конески, во рамките на редовните програми „Актуелно“ и „Радио спектар“ на Македонското радио – Радио Скопје, а девет разговори беа реализирани во годините пред Годината во чест на Конески, односно во периодот од 2017 до 2020 година во авторскиот проект „Quo vadis“ и во програмата „Актуелно“.

Во книгата со свои видувања за животните врвици и дело на Блаже Конески се застапени проф. д-р Васил Тоциновски, две интервјуа, проф. д-р Вера Стојчевска Антиќ, четири интервјуа, проф. д-р Искра Пановска Димкова, проф. д-р Лидија Тантуровска, Тони Гламчевски, проф. д-р Атанас Вангелов, проф. д-р Ана Витанова Рингачева, проф. д-р Димитар Пандев, седум интервјуа, академик проф. д-р Влада Урошевиќ, проф. д-р Златко Крамариќ, проф. д-р Весна Мојсова Чепишевска, две интервјуа, проф. д-р Елена Јованова Грујовска, проф. д-р Људмил Спасов, пет интервјуа, проф. д-р Лилјана Макаријоска, проф. д-р Ана Мартиноска, проф. д-р Агим Пољоска, проф. д-р Трајан Гоцевски, проф. д-р Максим Каранфиловски, проф. д-р Милан Јазбец, доц. д-р Бобан Карапејовски, д-р Славчо Ковилоски и Атанас Конески.

Покрај тоа, книгата, која излезе со финансиска поддршка на Министерстото за култура, е збогатена и со рецензиите на проф. д-р Васил Тоциновски, проф. д-р Вера Стојчевска Антиќ, проф. д-р Димитар Пандев, проф. д-р Милан Јазбец, Љубен Конески и доц. д-р Бобан Карапејовски.

„Блаже Конески – македонски тестамент“, авторот ја посветува во знак на огромна благодарност и вечен спомен на неговата животна сопатничка Искра Чоловиќ, доајен на македонското спикерство, новинар и истакнат македонски публицист, автор и коавтор на 14 книги.

Инаку, Свето Стаменов, како свој прилог кон сеопштото одбележување на стогодишнината од раѓањето на Блаже Конески, во 2021 – годината во чест на Конески, заедно со проф. д-р Вера Стојчевска Антиќ ги приреди зборниците на трудови „Навраќање кон Конески“ и „Уште едно навраќање кон Конески“, во кои беа објавени осумдесетина трудови на македонски и странски автори посветени на ликот и делото на великанот Блаже Конески. На стогодишнината од раѓањето на Конески беше посветена и неговата двотомна книга „Јазикот – нашата единствена комплетна татковина“, која содржи 50 интервјуа посветени на македонскиот современ јазик.

Регион

Приштина го „конкретизираше“ ветувањето, се обврза на воспоставување на ЗСО

Приштина го „конкретизираше“ ветувањето, во писмо до Советот на Европа се обврза на воспоставување на ЗСО.

Во писмото до претседателот на Парламентарното собрание на Советот на Европа, Владата на Косово се обврза да подготви нацрт-статут за Заедницата на српски општини (ЗСО), односно за здружување на општините со српско мнозинство.

„Владата на Република Косово во писмото се обврзува да подготви нацрт за воспоставување механизам за самоуправување, координација и соработка на општините со српско мнозинство на Косово, кој ги исполнува наследените меѓународни обврски на Косово, ги исполнува потребите на граѓаните на српската заедница на Република Косово, но во исто време го почитува Уставот во целина, како и секој негов детал, и сите закони на Република Косово, како и принципите на Советот на Европа“, објави Mинистерката за надворешни работи на Косово, Домника Гервала на својот Фејсбук профил.

Предлог-статутот на здружението на општините со српско мнозинство, додаде таа, служи на целта на владата за интегрирање на заедниците, но и за спроведување на законите на Косово во сите општини.

Свет

Во американскиот конгрес поднесена предлог-резолуција за признавање на Накба

Американската конгресменка со палестинско потекло Рашида Тлаиб претстави предлог-резолуција за признавање на палестинската Накба.

Американската конгресменка со палестинско потекло Рашида Тлаиб претстави предлог-резолуција за признавање на палестинската Накба, термин кој се однесува на масовното протерување на Палестинците од нивната татковина за време на создавањето на Израел во 1948 година.

Оваа резолуција, која ја одбележува 76-годишнината од Накба и промовира свесност и разбирање за овој историски настан, исто така го повикува Конгресот да ја врати поддршката за Палестинската агенција на ОН за бегалци (УНРВА).

САД го суспендираа финансирањето на УНРВА по израелските наводи дека некои од персоналот на Агенцијата биле поврзани со нападот на Хамас на 7 октомври, за што Тел Авив не обезбеди докази.