Новите правила, објавени вчера, се дел од пошироката кампања на Пекинг со цел да се зајакне контролата врз општеството и клучните економски сектори, вклучувајќи ја технологијата, образованието и пазарот на недвижности, по годините на брз раст.
Ограничувањата, кои се однесуваат на сите платформи, вклучувајќи ги и паметните телефони, се голем удар за глобалната индустрија за видео игри, каде младите играчи се најпрофитабилниот пазар.
Тие го ограничуваат времето за деца под 18 -годишна возраст да играат по еден час дневно, од 20 до 21 часот, и тоа само во петок, сабота и недела, пренесува државната новинска агенција Ксинхуа. Еден час дневно, исто така, ќе може да се игра и на државни празници.
Правилата на регулаторот, Националната агенција за медиуми и издавачи доаѓаат во време на пресметка на Пекинг со кинеските технолошки гиганти како Алибаба и Тенсент Холдинг.
Кампањата насочена кон она што државата го нарекува „див раст“ на некои компании довело до губење милијарди долари на берзите во Кина и во странство.
„Тинејџерите се иднината на нашата татковина“, рекол портпаролот на агенцијата. „Заштитата на физичкото и менталното здравје на младите луѓе е од витален интерес на нацијата и е поврзана со одгледување на помладите генерации во време на национално подмладување“, додава Ксинхуа.
На компаниите за видео игри нема да им биде дозволено да им нудат услуги на децата надвор од одреденото време и ќе мора да воведат системи за верификација во реално време, соопштил регулаторот кој го следи пазарот на видео игри.
Според правилата од 2019 година, Кина ги ограничи лицата под 18 години да играат видео игри час и 30 минути секој ден и три часа за празниците.