Могерини призна дека состанокот почнал со аплауз за постигнатиот договор со Грција, но оти тоа нема да биде доволно земјава, без постигнати резултати во реформскиот процес, во јуни да ги отпочне преговорите со Унијата.

– Ова претставува позитивен чекор кој ќе има влијание врз отворањето преговори, но не е единствен елемент, и тоа нашите пријатели во Северна Македонија го знаат, дека фокусот на реформската агенда е исто толку круцијален колку и решението на спорот за името, изјави Могерини.

Во меѓувреме, во земјава продолжува спроведувањето на Преспанскиот Договор. Новото име од денеска е поставено и на сигнналната табла на граничниот премин Делчево. Шефот на државата, Иванов, судејќи според официјалната веб страница, се уште е претседател на Република Македонија. Иако рокот за промена на сите дигитални записи и логоа, истече во петокот, официјалната интернет страница на Иванов останува непроменета. Најави за бојкот на новото име стигнуваат и од Грција. Префектот на областа Централна Македонија, Ѕиѕикостас, порача дека нема намера новото име на земјава биде поставено на таблите во областа под негова надлежност.

-Нема шанси на пат што е во наша одговорност, на периферијата да се постави табла на која ќе го пишува терминот Северна Македонија. Да биде јасно, сѐ додека сум јас префект, на таблите на нашите улици ќе пишува Скопје, вели Апостолос Ѕиѕикостас, префект на грчката област Централна Македонија

За можноста прашањето за името да биде повторно отворено, од идните влади на двете земји, денеска зборуваше и германскиот министер за Европа, Михаел Рот. Во интервју за Етнос, Рот вели дека од таквото сценарио никој нема да има корист зашто се работи за веќе решен спор.