Македонија

Мисајлоски: Македонија засега не размислува за враќање на задолжителниот воен рок

Хрватска и Србија од следната година ќе го враќаат задолжителниот воен рок, но иако оваа обврска стана план на владите на дел од балканските земји, во Македонија ниту има иницијатива, ниту се размислува за задолжително служење на војска.

Министерот за одбрана Владо Мисајловски вели доколку има потреба и причина за тоа АРМ и сите стручни служби се подготвени веднаш да го разгледаат ова прашање.

-Јас многу пати сум кажал дека навистина е убаво секој еден млад човек да помине определен период во армијата, но сега таа можност исто така е дозволена во законот, секој доброволно може да биде дел од Армијата. Но, сега за сега ова не е на маса, но доколку има иницијатива и причина се разбира дека тоа ќе биде разгледано, вели Владо Мисајловски – Министер за одбрана.

Мисајловски информираше дека Македонија следната година ќе издвои 329 милиони евра за одбраната, со што ќе го исполни условот од НАТО да одвојува два отсто од бруто домашниот производ, од кои 32 отсто или 106 милиони евра се наменети за модернизација на армијата..

„ Имаше заложби да биде и овој период над 2 проценти се разговараше на состаноците да се стигне и до 3, 3,5 проценти, останува да видиме по јануари кое ќе биде барањето и на новата администрација но во овој момент она што е барано од нас како армија да биде 2 проценти, тоа е испочитувано. Мислам дека околу 23 земји, горе-доле имаат над 2 проценти од буџетот, но има и големи држави кои што не го достивнуваат. Ќе биде навистина тешко да се одвојуваат дополнителни средства од секоја земја во делот од одбраната, “истакна Владо Мисајловски – Министер за одбрана.

Мисајловски за следната година најави и започнување на постапка за прием на нови 300 професионални војници. “. Додаде дека наредната година ќе се инвестира во најголем дел од капацитетите на МО, кои се во лоша состојба, меѓу кои Домот на АРМ во Скопје, како и одморалиштата во Дојран и Свети Наум.

Свет

Во западна Сирија во тек е операција против милициите кои го поддржуваат Асад

Сириските безбедносни сили спроведуваат операција во западниот дел на земјата против милициите кои го поддржуваат соборениот претседател Башар ал Асад, пренесоа светските агенции, повикувајќи се на државната новинска агенција.

Операцијата е во тек во западната провинција Тартус, населена со малцинството на Алаутите, од каде што потекнува Асад, кој беше соборен на 8 декември од бунтовничките групи.

За време на воените дејствија, „голем број членови на вооружени групи“ лојални на Асад „биле неутрализирани“, соопшти агенцијата, која прецизираше дека целта на операцијата била „да се врати безбедноста, стабилноста и граѓанскиот мир“ во крајбрежната провинција.

Невладината организација Сириска опсерваторија за човекови права соопшти дека за време на денешната операција биле убиени три лица и прецизира дека жртвите биле борци „лојални на претходниот режим“.

Македонија

БИРН: Артан Груби нема албанско државјанство

Поранешниот вицепремиер Артан Груби нема албанско државјанство, пренесува БИРН.

Во текстот на порталот пишува дека и советникот за медиуми на албанскиот претседател, Арта Сакја и новинарите на БИРН од Албанија немаат пронајдено никаков запис во тамошниот службен весник дека Груби добил државјанство.

Артан Груби во моментов не им е достапен на органите на прогонот откако пред десет дена успеа да ја напушти државата. Кривичниот суд на 17 декември одреди 30- дневен притвор за него, додека МВР веќе следнииот ден распиша меѓународна потерница.

Свет

Мао: Кина нема да чека да и бидат загрозени безбедносните интереси

 Портпаролката на кинеското Министерство за надворешни работи, Мао Нинг денеска изјави дека Пекинг нема да чека да и бидат загрозени безбедносните интереси, алудирајќи на соработката помеѓу Филипини и САД.

- Соработката на Филипините со САД, вклучувајќи го и распоредувањето на американскиот ракетен систем Тајфун, носи ризик од геополитичка конфронтација и трка во вооружување во регионот, истакна Мао.

Кинеското МНР ги повика Филипини да се придружат на стратешката автономија и мирниот развој.

- Во соработката со САД и распоредувањето на ракетниот систем Тајфун, Филипини ја предаде на други сопствената безбедност и националната одбрана … Уште еднаш ја советуваме филипинската страна дека единствениот правилен избор за обезбедување на нејзината безбедност е да се придржува до стратешката автономија, добрососедството и мирен развој, посочи Мао.

Американскиот систем Тајфун, кој може да биде опремен со крстосувачки ракети способни да погодат кинески цели. Пред два дена филипинскиот министер за одбрана Жилберто Теодоро истакна дека распоредувањето за заеднички вежби е „легитимно, законско и неоспорно“.

Ривалството помеѓу Кина и Филипини се зголеми изминатите години поради нивните претензии во Јужно Кинеско Море, а соработката помеѓу Манила и Вашингтон дополнително ги зголеми тензиите.

притисни ентер