„Знаев, како и сите други, дека Германија не може да прима по 10.000 луѓе секој ден, но дека мора да се најдат одржливи решенија и за луѓето кои бараат засолниште и за нашата земја“, изјави Меркел за неделното издание на „Франкфуртер алгемајне цајтунг“.

Во 2015 година, кога Европа доживеа огромен прилив на бегалци од Блискиот Исток, Меркел првично одлучи да ги задржи границите на Германија отворени, велејќи „Можеме да го направиме тоа“.

Таа рано почна да размислува за договор со Турција за прифаќање сириски бегалци. „Но, ми требаше малку време“, рече Меркел.

Во Германија, тогашниот прв либерален став заслужи почит, како и остри критики.

Канцеларката сега рече дека отсекогаш била свесна дека е политички одговорна за се` што се случило, „и за убавите времиња, кога бегалците беа пречекани со раширени раце, и за лошите моменти“.

Меркел нагласи и дека Германија не може сама да го реши миграциското прашање, туку само „како дел од Европа и во конкретниот случај во соработка со Турција“.

Таа го пофали договорот за бегалците постигнат меѓу Анкара и ЕУ во 2016 година, велејќи дека двете страни имаат корист од него и дека денес е разумен.

„Тој во голема мера придонесе да се воведе ред во миграцијата и да и` помогне на Турција да се грижи за милиони сириски бегалци. И со години го спречува криминалниот бизнис на шверцери со луѓе“, рече Меркел за договорот.

Една од одредбите на договорот меѓу ЕУ и Турција беше Анкара да ја спречи илегалната миграција во Европската унија, а Грција да ги враќа во Турција мигрантите кои илегално пристигнале на некои од островите во Егејското Море.

Брисел, пак, вети дека ќе земе по еден сириски бегалец од Турција за секој вратен Сириец и вети дека ќе и помогне на Турција финансиски да се грижи за бегалците на своја територија.