Делегацијата на Република Македонија ја предводеше амбасадорот Ѓорѓи Филипов, а дел од неа беа и амбасадорот Кире Илиоски, амбасадорот на културата Елена Мисиркова и претставникот на Македонската културна заедница во Виена, Димче Лазовски, соопшти македонската амбасада во Виена.

Од име на македонските граѓани и во знак на сеќавање на починатите и преживеаните логораши, македонски Евреи, родољуби, тие положија венец свежо цвеќе. Постојат сведоштва за престој на македонски Евреи во овој логор, за загинати, но и преживеани односно спасени. Меѓу нив е и дедото на актуелниот директор на македонскиот „Музеј на холокаустот“ што се наоѓа во Скопје.

Годинешното меѓународно одбележување во поранешниот логор Маутхаусен се одржа во чест и слава на спасувачите на Евреи, кои покажувајќи неизмерна храброст, успеале да спасат Евреи од затворање, депортирање или екгзекуција.

На одбележувањето присуствуваа околу 10.000 учесници од сите краишта на светот, меѓу нив и преживеани логораши.

Во логорот, во периодот од 1938 до 1945 престојувале околу 200.000 Евреи и припадници на 70 останати нации и вери, но и противници на нацистичкиот режим. Од нив не успеале да преживеат 90.000.

Годинешново сеќавање се одвиваше под мотото „Вредноста на животот“, а го организираа Меѓународниот комитет Маутхаусен, Здружението на преживеани логораши од Маутхаусен, како и Владата на Австрија преку Министерството за внатрешни работи.

Австриската делегација ја предводеше претседателот на Парламентот, Барбара Прамер, а на настанот присуствуваше и канцеларот Вернер Фајман.