Емилија Кабранова-Филипова почнала да свири пијано на осумгодишна возраст. Средно образование завршила во ДМБУЦ „Илија Николовски-Луј“ во класата на проф. Кристина Ангеловска-Крагуевска, а дипломирала во класата на проф. Стела Слејанска. Добитничка е на повеќе награди. Од 2005 година работи како професор по пијано и пијано соработник во ДМУЦ „Тодор Скаловски-Тетоец“-Тетово и во ДМБУЦ „Илија Николовски-Луј“ и настапува со ученици на меѓународни натпревари низ Србија, во Белград, Ниш, Пожаревац, Сремска Митровица.

Пијано соработник е со хорот „Менада“ со кој остварила бројни настапи низ Македонија, Албанија, во Драч, Тирана... Од 2011 година работи во ООМУ „Владимир Арсовски“-Неготино. Со сопранот Кристина Палија остваруваат успешна соработка. Настапиле со самостојни концерти во Неготино на манифестацијата „Топол културен бран“, во Кавадарци, Виница, Велес.

Кристина Палија – сопран, средно стручно образование завршила во Средното музичко училиште во Штип, на отсекот по соло пеење кај проф. Александра Коцевска. Прв циклус на студии запишува на Универзитетот „Св. Кирил и Методиј“ во Скопје на Факултетот за музичка уметност. Добитник е на повеќе награди во Македонија, Србија, Косово... Дипломирала на ФМУ во Скопје, во класата на проф. Марија Муратовска – Наумовска, а магистрирала на Универзитетот „Св. Кирил и Методиј“ во Скопје, на Факултетот за музичка уметност, со највисока оцена на отсекот по соло пеење, 10 во класата на проф. Весна Ѓиновска – Илкова. Своето деби го доживува на сцената на Македонската опера и балет со улогата на „Микаела“ во операта „Кармен“.