Директорот на Царинската управа на Република Македонија Ванчо Каргов, по денешниот седми состанок на ЦЕФТА Поткомитетот за царина и правила на потекло што се одржува во Скопје, рече дека во постапка се три барања за издавање дозвола овластен економски оператор и оти се надева до крајот на годината дека ќе издадат барем на една компанија. Вели дека станува збор за производствени компании.
- Тоа значи дека компаниите се одлично организирани, Царинската управа има одлична соработка со нив, им верува на нивните системи за контрола и извесно е дека тие ќе бидат изземени од редовна царинска контрола на која подлежат сите други компании, изјави Каргов.
Тој додаде дека станува збор за компании кои имаат високи стандарди во работењето, ја знаат работата и сами го проценуваат превентивно ризикот од царински измами.
Истакна дека ова е голема повластица во нивното работење.
Засега се однесува само на царинската постапка во земјава, а понатаму е планирано со потпишување договори меѓу царинските служби со други држави да може да биде надвор од редовната царинска постапка и во друга држава од ЦЕФТА или ЕУ.
Ваквите договори, како што појасни директорот Каргов, ќе значи дека нашите организации и регулатива се на исто ниво и дека си веруваат меѓусебно.
Директорот на Царинската управа истакна дека за време на претседавањето со ЦЕФТА Поткомитетот се постигнати и други значајни резултати како што е воспоставувањето врска меѓу ЦЕФТА и Протоколот за потекло и Конвецијата за Пан-евро медитеранската конвенција, со која дијагоналната кумулација ќе се прошири со ЦЕФТА земјите и подоцна со медитеранските земји.
- Ова ќе овозможи бесцарински увоз и извоз во рамките на ЦЕФТА земјите заедно со ЕУ. Тоа дава можност за дијагонална кумулација на потеклото со земјите од Медитеранот. Република Македонија веќе почна со иницијатива за склучување нови договори за слободна трговија, кои треба да ја поттикнат нашата надворешна трговија, односно извозот во овие земји, рече Каргов.
Одговарајќи на новинарско прашање во врска со увозот на производи од Хрватска откако таа влезе во ЕУ, рече дека од јули таа не е повеќе членка на ЦЕФТА и сите правила што важат за земјите членки на ЕУ важат и за Хрватска. - Веќе немаме таква трговија со Хрватска. Поради ова зголемено е учеството во вкупната трговија со преференцијален третман во рамки на ЕУ. Околу 75 отсто од целокупната трговија што има преференцијален третман веќе е со ЕУ за сметка на ЦЕФТА. Тоа е разбирливо бидејќи Хрватска веќе има намалено учество, изјави Каргов.