Ако се спремате да јадете хот-дог додека гледате некој натпревар, размислете двапати, бидејќи е утврдено дека на овој начин си го скратувате животот, верувале или не, дури за 36 минути. Плескавиците и газираните сокови сосема очекувано се на листата на најштетни намирници.

Нутриционистот Луис Алберто Замора користел податоци од студија спроведена од еден универзитет во Мичиген и заклучоците од истражувањето се навистина интересни. Одамна е познато дека ултрапреработената храна е многу лоша за здравјето, но овој пат тоа е изразено со прецизна минутажа.

Во истражувањето учествувале 5.800 луѓе кај кои биле следени навиките во исхраната, како и количината на калории што ја консумирале. На крајот, научниците имале неколку лоши, но и неколку добри вести. Освен познатиот хот-дог, најголем штетен фактор имаат и сувомесните производи – тие одземаат 24 минути живот, сендвичите 13,6 минути, плескавиците 9 минути, газираните пијалоци 12 минути и сланината 6 минути.

Тоа можеби не звучи страшно, но ако, на пример, изедете хот-дог, плескавица и испиете газиран пијалок, ќе изгубите еден час од животот, а тоа секако не е малку.

Од друга страна, постојат намирници кои можат да ви го продолжат животот – одредени видови риби можат да ви „додадат“ 10 минути живот, овошјето „додава“ 10 минути, јаткастите плодови 24 минути, а путерот од кикирики дури 32 минути.

Утврдено е дека на секои 10 проценти од дневната количина на калории, кои ги добивате од овошјето и зеленчукот, а не од месото и месните производи, си го продолжувате животот за цели 48 минути.

Исто така, треба да се има предвид дека дури 75 проценти од храната што се продава, на пример, во Америка, е ултрапреработена и дека бројни студии откриле дека постои директна поврзаност на овој вид храна со над 30 различни видови здравствени проблеми - од неколку видови на канцер, до зголемен ризик од срцеви заболувања, пренесува Дејли меил.