Привремен патен лист по број 100.501 добил експремиерот Груевски во унгарската амбасада во Тирана, за да може да биде трансфериран до Будимпешта.
Ова практично објаснува и зошто Груевски со унгарски дипломатски возила бил пренесуван низа Албанија, Црна Гора и Србија.
Овој привремен патен документ уште наречен „пасаван“, е познат во конзуларната практика, но најчесто се издава на државјани во случај пасошот да им истекол или бил загубен завреме на престој во странство.. Со оглед дека бара азил, јасно е дека Груевски не е унгарски државјанин, па се поставува прашањето врз основа нба што тој добил ваков документ?
Поранешниот амбасадор Ристо Никовски, вели дека од познатите информации е очигледно дека екс-премиерот уште кога стапнал на амбасадата во Тирана, побарал азил, а врз основа на тоа добил заштита од Унгарија.
По информациите за вмешаноста на Унгарија во бегството на Груевски, вчера македонското МНР му врачи протестна нота на унгарскиот амбасадор во земјава Ласло Дукс. Одговор на неа засега од Будимпешта нема, но шефот на дипломатијата Сијарто повтори дека Унгарија немала никаква улога во бегството на поранешниот премиер, а откако тој се пријавил во нивна амбасада и побарал азил, Унгарија ги почитувала сите меѓународни правила при трансферот до Будимпешта.
Никовски вели дека е вообичаена пракса да се врачи протестна нота во вакви случаи, но според него, се ќе остане на тоа, а односите на двете земји нема трајно да бидат нарушени.