- Арбитражната комисија ја укина одлуката на комесарот и со тоа го стави Работнички во иста позиција каква што беше по натпреварот со МЗТ Скопје, а пред донесувањето на одлуката за исклучување од Прва лига. Комесарот не би требало да се занимава со толкување на правната проблематика, ниту, пак, со прес-конференции за дефокусирање од проблемот, туку со исполнувања на барањата кои арбитражната комисија ги постави, а со цел да се согледа целокупната вистина за овој случај. Работнички се жалеше и докажа дека има низа пропусти и од страна на судиите и делегатот, како и од комесарот во делот на примената на членовите по кои е казнет, а воедно во изјавите кои ги дадоа играчите и капитенот децидно се вели дека од нив не било побарано од ниедно службено лице, ниту од првиот судија, ниту од делегатот, да се вратат од соблекувалната и да го доиграат натпреварот, се вели во соопштението.

Бараме, се нагласува, процедурата да продолжи понатаму како што е предвидено со упатствата од арбитражната комисија, а согласно правилниците на МКФ.

- Му благодариме на комесарот за изречените убави зборови околу важноста на Работнички за македонската кошарка, но во овој момент неговиот предлог за поведување на вонинституционална постапка сметаме дека е спротивен на легалната процедура. Во моментов Работнички ќе ја бара правдата кај сите институции кои се надлежни за решавање на овој спор, почитувајќи ги насоките на арбитражната комисија, се додава во соопштението на клубот од „Градски парк“.

Уште еднаш, се потенцира, нагласуваме дека КК Работнички сака своите победи да ги остварува само на терен, а не на зелена маса, и дека никогаш нема да дозволиме некој да си поигрува со реномето и величината на нашиот клуб.

За денеска со почеток во 15 часот е закажана седница на Здружението на прволигашите на која според дневиот ред единствено ќе треба да се расправа за прекинатиот натпревар меѓу Работнички и МЗТ Скопје Аеродром.