Македонија

Извлечени три 16-годишни момчиња заробени на островче од надојдената Треска

Од тинејџерска игра до животна опасност. Три 16 годишни момчиња синоќа речиси до полноќ останаа заглавени на мал остров на реката Треска поради надојдената вода која се испушта од ХЦ Козјак и Матка.

Од тинејџерска игра до животна опасност. Три 16 годишни момчиња синоќа речиси до полноќ останаа заглавени на мал остров на реката Треска поради надојдената вода која се испушта од ХЦ Козјак и Матка, што доведе до уште едно долго и филмско извлекување на ЦУК и МВР помогнати од мештаните од С.Грчец. Од ЦУК велат невниманието довело до ризичната состојба, бидејќи момчињата воопшто и не забележале дека нивото на водата се подигнува, а кога им станало јасно, веќе било доцна за самостојна евакуација, бидејќи реката речиси и го надминала коритото.

Оваа река која сега изгледа мирно и тивко, во подоцнежните часови е навистина брза, подлабока, а со тоа и поопасна, бидејќи во тие часови се испушта повеќе вода од браните за производство на електрична енергија.

Првиот обид за евакуација со чамец на МВР бил неуспешен поради силната река, а и обидот на Црвениот крст не поминал подобро. По бројните обиди и отпорноста на надојдената река решение се побарало во запирање на водата од страна на ХЦ Матка и Козјак кои работеле со максимален погон за производство на струја, што на крајот се покажало како вистински потег, но и за тоа било потребно време.

-Да ги сопрат браните и што е можно помалку да истекува вода, на оној биолошки минумум практично што е потребен за реката за да може да се намали силината и големината на водата во тој дел. Но, потребно е време да помине тој напливен бран од вода и требало да се чека затоа акцијата траела толку долго. На крај, водата намалила на безбедно ниво, кога можело да се интервенира,- – Илија Бојаровски – Портпарол на ЦУК.

Момчињата кои се нашле во опасната состојба се од околните места, а пријавата до ЦУК пристигнала околу 19 часот. Од ЦУК апелираат до граѓаните да бидат внимателни околу коритото на Треска особено во попладневните и вечерни часови кога турбините на браните работат поинтензивно, што се случува редовно, секој ден.

Свет

Финска енергетска компанија бара заплена на танкерот кој наводно го пресекол подводниот кабел

Компанијата која е оператор на финската електроенергетска мрежа Фингрид денеска соопшти дека побарала од судот во Хелсинки да го заплени нафтениот танкер Игл Ес.

Компанијата која е оператор на финската електроенергетска мрежа Фингрид денеска соопшти дека побарала од судот во Хелсинки да го заплени нафтениот танкер Игл Ес во обид да ги обезбеди своите побарувања како отштета за штетата на подводниот кабел за пренос на енергија Естлинк 2.

Финската агенција за транспорт и комуникации претходно денеска соопшти дека ќе изврши контрола на нафтениот танкер „Игл Ес“, кој е осомничен дека припаѓа на руската „фантомска флота“ и дека предизвикал оштетување на подводен кабел во Балтичкото Море.

„На 2 јануари 2025 година, Финската агенција за транспорт и комуникации (Трафиком) ќе започне контрола на танкерот ‘Игл Ес’,“ соопшти директорката на Трафиком, Сана Сонинен, прецизирајќи дека инспекцијата ќе биде дополнување на истрагата што ја води финската полиција.

- Инспекцијата ќе ја извршиме на начин што нема да пречи на полициските операции и истрагата, потенцираше Сонинен.

„Игл Ес,“ кој плови под знамето на Кукови Острови, е осомничен дека на католички Божик го оштетил подводен електричен кабел „ЕстЛинк 2“, кој ги поврзува Финска и Естонија низ Балтичкото Море.

Танкерот беше спроведен со придружба до пристаништето Килпилахти, на 40 километри источно од Хелсинки, каде што истражителите го прегледуваат и го испитуваат неговиот екипаж од околу 20 лица. Од вторникот, седуммина морнари се под сомнение и им е изречена забрана за патување.

Се сомнева дека „Игл Ес“ е дел од руската „фантомска флота“ – бродови што превезуваат руска сурова нафта и нафтени производи под ембарго.

Во петокот, НАТО објави дека ќе го засили своето воено присуство во Балтичкото Море.

По руската инвазија на Украина во февруари 2022 година, во Балтичкото Море се регистрирани бројни слични инциденти. Според експерти и политичари, овие акции насочени кон енергетската и комуникациската инфраструктура се дел од хибридната војна меѓу Русија и западните држави.

На 17 и 18 ноември, во шведски територијални води беа прекинати два телекомуникациски кабела. Стокхолм го сомничи товарниот брод „Ји Пенг 3“, кој пловел под кинеско знаме, дека бил во областа кога се случил инцидентот.

Европската Унија најави зајакнување на мерките за заштита на подводните кабли, преку подобрување на размената на информации, примена на нови технологии за откривање и поправка и засилена меѓународна соработка.

Македонија

Автомобил излетал од патот кај село Рашче и паднал во Вардар

Во СВР Скопје попладнето во 16 часот е пријавено дека на локалниот пат за село Рашче патничко возило излетало од патот и паднало во река Вардар.

Од МВР за МИА информираа дека веднаш на местото на настанот се упатени полициски службеници и Итна медицинска помош, а екипа на САЕ Тигар презема мерки за вадење на автомобилот.

На лице место е и јавен обвинител.

Живот

Жена остава торба на туѓ праг, сопственикот занемел кога видел што има внатре (ВИДЕО)

На социјалните мрежи кружи видео од њујоршкото предградие Лонгвуд.

Гледаме непозната жена како оди покрај тротоарот, застанува пред куќа и остава зелена торба на прагот.

Тоа било снимено од надзорна камера во неделата, во доцните попладневни часови, а она што се случило потоа ја шокира јавноста, пишува Дејли мејл.

Сопственикот на споменатата куќа Мамад Хафиз Џелу не знаел што се случува сѐ додека на телефон не му се јавил соседот. Она што го слушнал го натера да поита надвор и да ја отвори торбата!

„Имаше мало девојче внатре. Многу плачеше. Бев многу исплашен и му реков на соседот да повика брза помош. Ја внесов во куќата и повикав полиција“, објаснил Џело.

Тој додава дека бебето било старо неколку дена и потоа било пренесено во локалната болница. Лекарите рекле дека е во стабилна состојба и очекуваат да преживее.

Додека несреќното девојче е под надзор, полицискиот оддел на Њујорк се обидува да ја идентификува и лоцира жената фатена на камера.

„Мило ми е што таа е безбедна. Во исто време, шокиран сум што некој би можел да го направи ова“, рекол сопственикот на куќата во Лонгвуд.

Слично реагираа и неговите соседи, а Донел Варден за медиумите изјави дека целата приказна е „вознемирувачка“.

„Ако мајката не го сакала детето или околностите биле поинакви, зошто не го ставила на посвојување или не повикала полиција“, прашал тој.

Според важечките закони, возрасен не би одговарал доколку го предаде бебето на надлежните органи и на безбедно место. Полицијата ги повикала сограѓаните да помогнат во откривањето на жената.