- Ова е главната порака од Извештајот, исклучително битна, но во него се забележани и работите што се остварени, но и областите каде што има потреба од поголема посветеност во следниот период. Тоа што е многу битно во овој период од објавување на Извештајот на ЕК до состанокот на Советот во декември, е можноста што ја дава оваа препорака за понатамошно унапредување на реформите како што се забележува во самиот Извештај и можностите да најдеме отворен и конструктивен начин за да имаме напредок во споровите со нашите соседи членки на ЕУ, Бугарија и Грција, рече Бесими.

Земјата ги има исполнето политичките критериуми на ЕУ и по петти пат дава препорака за почеток на преговорите.

- Ние сме свесни дека ова звучи како позиција статус кво, меѓутоа само да кажам дека и оваа ситуација бара повторно и работа и посветеност за земјата да се фокусира на работите коишто се забележани во Извештајот, изјави Бесими.

Вицепремиерот ги изнесе поважните оценки што се содржани во Извештајот и посочи на важноста од консензус по ова прашање.

Ивон Величковски, пратеник од Либералната партија, праша дали решавањето на спорот е еден од клучните аргументи пред Европскиот совет.

- Статус кво може да ја чини Македонија многу скапо. Кој е дијалогот со новинарите? Вие се уште ги немате повлечено предложените закони за медиуми. Пак ве повикувам да ги повлечете законите, особено законот за медиуми, рече Величковски.

Бесими рече дека приоритетите на Македонија пред Eвропскиот совет се имплементацијата на препораките што произлегуваат од политичкиот дијалог во земјата и во Парламентот во работната група, реактивација на дијалогот со новинарите во однос на легислативата во оваа област, зајакнување на аргументите во однос на владеењето на правото или пак независноста на судството, продолжување на имлементацијата на Рамковниот договор и добрососедство и иницијативите што би произлегле од македонска страна за постигнување готовност за решавање на спорот за името.

За пратеникот Беким Фазлиу од ДПА, Македонија останува на исто место односно веќе оди наназад.

- Секој неуспех во евроинтеграциите во Македонија се рефлектира кај Албанците. Вие станувате главни спонзори на националистичките политики на оваа Влада, на проектот „Скопје 2014“, на навредувањето, тепањето и економскиот апархејд на Албанците..., рече Фазлиу.

Во контрареплика вицепремиерот Бесими истакна дека се разбира дека ДУИ и ДПА имаат разлики во пристапот.

- Целта да ни биде иста - нашата земја да биде рамноправна членка на ЕУ и НАТО. Во ниту еден случај во мојот говор не реков дека статус квото е успех, но го спомнав тоа и реков дека ние сме посветени на тоа и не реков дека немаме предизвици. Но, главниот предизвик е ние да ги надминеме разликите со нашите соседи, и да најдеме решение за прашањето за името, изјави Бесими.

Вицепремиерот Бесими, според Горан Мисовски од НСДП ниту еднаш во своето обраќање во Парламентот не ја споменал Република Македонија по име туку три пати рекол нашата земја. Мисовски изрази, како што рече, разочарување од ова, но и од фактот дека не споменал дека во Извештајот јасно и децидно е наведено дека пратениците и новинарите на 24 декември се исфрлени од Парламентот, и дека во областа на слободата на изразување продолжи да се влошува и на домашен и на меѓународен план.

Вообичаено, Беким Фалиу од ДДПА побара пауза од еден час поради, како што рече потпретседателката на Собранието од ДУИ Сузана Салиу, иако 15 месеци е веќе на оваа функција не претседава со него и поради тоа што Албанците не ги слушаат изворно албанските пратеници.