Постановката ја сочинуваат дела од 62 ликовни автори членови на Друштвото, а се реализира со поддршка на Министерство за култура на Република Македонија по повод јубилејната билатерална соработка со Република Чешка.
Инаку, изложбата „Експериментален цртеж“ се организира од страна на ДЛУМ шеста година по ред. Изложбениот концепт на проектот претендира да го разработи процесот на отстапување од традиционалната форма на цртежот.
- Иако валиден како независен медиум, основниот акцент е ставен на критичкото преиспитување на природата и вредноста на цртежот во комбинација со широк спектар на уметнички техники и дисциплини. Современиот македонски цртеж не ги исклучува традиционалните техники, туку често го проширува полето на истражување и експериментирање вклучувајќи различни трансформации. Изложбата вклучува дела кои го поврзуваат цртежот со сликарството, скулптурата, фотографијата, графитот, дигиталната уметност, наведуваат од ДЛУМ за изложбата.
Друштвото на ликовните уметници на Македонија (ДЛУМ) е формирано во 1946 година и е првото, најстаро и најбројно стручно друштво на ликовни уметници во земјата. Преку своите тематски изложби и културни настани, ДЛУМ денес и има дадено есенцијален печат на македонската културна сцена и нуди широк спектар од традиционален до најсовремен ликовен израз помеѓу своите членови.
Помеѓу другите активности на ДЛУМ, се потенцира долгогодишната интернационална соработка, промоција на македонската уметност во видни галерии на Балканот и низ Европа, како и гостувања на странски уметници на македонската ликовна сцена.
Во текот на своето 69-годишно постоење ДЛУМ има реализирано преку 1.382 самостојни претставувања на македонски и странски автори пред македонската ликовна публика и преку 350 претставувања на Друштвото и македонски автори на меѓународната сцена.