Култура

Изложба од „Вевчански видувања“ во Амбасадата во Париз

Изложба на слики од Меѓународната ликовна колонија „Вевчански видувања“ вчера беше отворена во просториите на Амбасадата на Република Македонија во Париз по повод Денот на народното востание на Македонија.

На изложбата, под мото: „Пред и после бојата - слика многузборна“, беа претставени делата на 30 еминентни македонски сликари, како и на нивни колеги од Франција кои изминатите години имаат учествувано на ликовната колонија: Глигор Чемерски, Милош Коџоман, Мирослав Масин, Ниче Василев, Петар Попчев, Ставре Димитров–Стадим, Доне Милјановски, Таки Павловски, Павле Кузмановски, Емил Шулајковски и Станко Ѓорѓиев.... и француските учесници Клод Д’ервен, Ми-ан Хо, Сузел Билод, Весна Бајалска, Жакелин Делакрос и Сајед Дарвиш кои присуствуваа на свеченото отворање на изложбата.

Меѓународната ликовна колонија „Вевчански видувања“ се одржува од 25 јуни до 10 јули во живописното Вевчани. Од основањето во 2010 година учествувале повеќе од 200 ликовни уметници од Македонија и од странство.

Сликите создадени на Колонијата во изминатите седум години беа претставени на поголем број изложби, меѓу кои и во Подгорица, Софија, Њујорк, Москва и низ градови во Македонија.

Свет

Украина соопшти дека во изминатата ноќ соборила 23 дронови лансирани од Русија

Украинската противвоздушна одбрана соопшти дека синоќа соборила 23 од вкупно 24 дронови камикази лансирани од Русија на територијата на Украина.

Соопштението било објавено на социјалната мрежа Телеграм од украинските воздухопловни сили.

Оттаму посочија дека беспилотните летала биле лансирани од територијата на Курската област во Русија и Крим. Се додава дека воздушниот напад бил одбиен, а беспилотните летала биле соборени над регионите Харков, Херсон и Дњепропетровск, забележува Укринформ.

НБА

Јокиќ: Минесота е одличен и талентиран тим, ќе се бориме до крај

Кошаркарот на Денвер, Никола Јокиќ изјави дека Минесота е голем и талентиран тим, но истакна дека Нагетс ќе се борат за пласман во следната фаза од плејофот во НБА лигата, пренесуваат американските медиуми.

Минесота вечерва го победи Денвер со 106:99 и поведе со 1:0 во полуфиналето од плејофот на Западната конференција на НБА.

-Тие се одличен тим, талентирани. Покажаа зошто беа први на табелата во поголемиот дел од оваа сезона, изјави Јокиќ на прес-конференцијата по натпреварот.

Српскиот ас на прес-конференцијата се пошегува кога го прашаa што треба да се поправи и што да прави бидејќи играчите на Минесота постојано му се менувале во одбрана.

-Би сакал да имам клон, знаеш, да излезам да одморам и тој да игра. Потоа се враќам свеж. Ми ставија високи играчи, добри скокачи, дефанзивци... Беа агресивни. Јас сум среќен со ударите што ги упатив, некои не, но тоа е кошарката, ќе се обидеме да ги победиме во следниот натпревар, додаде Србинот.

Фудбал

Меси се запиша во историјата на МЛС лигата – гол и пет асистенции

Мајами веројатно беше разочаран од НБА тимот кој беше елиминиран на стартот од плеј-офот, но затоа уживаат во фудбалскиот тим и вештините на Лионел Меси.

Интер ја задржа лидерската позиција во Источната конференција и по 12. коло декласирајќи го Њујорк Ред Бул со 6:2 во дербито, со гол и пет асистенции на Меси и „хет-трик“ на Луис Суарез.

Водството на гостите од Њујорк на полувремето (Ванциер 30), го инспирираше Лео Меси да испише историја на МЛС. На Рохас му „сервираше“ два гола (48, 62), во меѓувреме донесе предност (50), а потоа трипати му испрати асистенција на Луис Суарез (69, 75, 81). Тој стана првиот играч во сезоната со 10 постигнати голови и прв играч во историјата на оваа лига со пет асистенции на еден натпревар.

Голот на Емил Форсберг во седмата минута од судиското надополнување ни малку не го расипа славјето.

Откако се опорави Меси, Интер е незапирлив, води на Истокот по 12 меча со 24 бода, Синсинати има три помалку и меч помалку. Торонто е трет со 19, а Њујорк останува четврти со 17 бодови.