Измените на изборниот законик и најавениот референдум и денеска главна тема на СДСМ и ВМРО-ДПМНЕ. Од опозицијата обвинуваат дека власта ги прекршува процедурите при носењето на измените на изборниот законик, а со референдумот се прикрива грабеж.

„СДСМ загази во криминал и сите манипулации околу референдумот и партиските преговори се само обид да се покрие грабежот што се одвива во моментов. Обидот да се измени Изборниот законик со мнозинство од 61 пратеник без било каква консултација со експертите и опозицијата говори за фрустрациите на Заев. Никој во досегашната парламентарна историја не се обидел да ги заобиколи демократските принципи кои се градени од сите релевантни политички партии со децении наназад.

Од владејачката СДСМ пак не ги споменаа измените на изборниот законик, но возвратија со појаснување што значи консултативен референдум, и тврдат дека одлуките на референдумот ќе бидат обврзувачки и неприкосновени.

„Граѓаните се носители на суверенитетот, граѓаните одлучуваат на избори и на референдум. Референдумот е вистинска и непосредна демократија, а волјата изразена на него мора да биде обврзувачка за сите, бидејќи гласот на граѓаните е клучен за македонската иднина“

Измените на изборниот законик доцна синоќа поминаа на комисијата за европски прашања. Седницата помина во тензична атмосфера, со жестоки кавги и меѓусебни обвинувања, а гласање по поднесените 400 амандмани немаше. Претседателот на комисијата Груби тоа го оправда со големиот број на пријавени за збор, имајќи предвид дека роковите биле пробиени. Од опозицијата пак, ја обвинија власта дека го крши уставот и деловникот за работа на собранието.

Измените на изборниот законик во понеделник ќе се најдат на седница на пратениците. Веднаш потоа, ќе следува изборот на нови членови на Државната изборна комисија.