Истражување: Сите Јапонци за 500 години би можеле да имаат исто презиме

 Сите Јапонци би можеле да имаат исто презиме за 500 години, доколку на сопружниците во брачна заедница не им се дозволи да имаат различни презимиња, посочува неодамнешно истражување. 

Тоа е спроведено како дел од кампањата за промена на „Граѓанскиот законик“ од 19. век кој налага дека сопружниците мора да имаат исто презиме, пишува „Гардијан“.

Во научниот труд, предводен од Хироши Јошида, професор по eкономија на Универзитетот нa Тохоку, се истакнува дека ако „властите продолжат да инсистираат“ сопружниците да бираат едно презиме (најчесто она на мажот - во 95 отсто од случаите), до 2531 година секој Јапонец ќе се презива Сато-сан. Јошида вели дека за истражувањето биле користени неколку претпоставки и оти неговата идеја била да се користат статистички податоци за да се објасни потенцијалното влијание на постоечкиот систем врз јапонското општество.

- Ако сите станат Сато, можеби ќе треба да се викаме само по име или по број. Мислам дека тоа не би било добар свет за живеење, изјави Јошида.

Според податоците од март 2023 година, Сато е веќе најчестото јапонско презиме, а по него е Сузуки. Некои корисници на социјалните мрежи мислеа дека анкетата е всушност првоаприлска шега бидејќи нејзините резултати беа објавени завчера. Сепак, тоа не беше така. Јошида рече дека неговата цел била да ги натера луѓето да размислуваат.

Според него, името Сато ќе го наруши достоинството на поединецот, покрај тоа што ќе резултира со губење на семејното и регионалното наследство.

Иако е дозволено моминското презиме да биде наведено во пасошот, возачката дозвола или потврдата за престој, Јапонија сè уште е единствената земја во светот каде што брачните другари законски се обврзани да го имаат истото презиме. Конзервативните членови на владејачката Либерално-демократска партија (ЛДП) сметаат дека промената на законот ќе го наруши семејното единство и ќе предизвика недоразбирања кај децата. /МИА

Новороденче, кое било прогласено за мртво, се разбудило на погребот- семејството верува во чудо

Бебе кое било прогласено за мртво набргу по раѓањето, е префрлено назад во болница во Парагвај откако добила знаци на живот за време на нејзиниот погреб.

Нејзините блиски кои се потресени од сѐ, изјавија дека не исклучуваат „Божја интервенција“, пренесува El Tiempo.

Девојчето е родено околу пладне во петокот со царски рез, откако нејзината 21-годишна мајка имала компликации во седмиот месец од бременоста.

Но, бебето било прогласено за мртво и предадено на семејството заедно со потврдата за смрт.

Таткото на бебето, Игнасио Медина, изјавил за локалната телевизија Телефутуро дека телото на бебето го добил „целосно виолетово“.

Семејството, кое веќе претрпело загуба на уште едно бебе од оваа двојка, наместо да слави, отишле на погребот во Минго Гуазу, место на околу 20 километри од Сиудад дел Есте, главниот град на департманот Алто Парана, кој граничи со Аргентина и Бразил.

„Ја однесовме кај мајка ми и таму ја гледавме“, рече Медина.

Тој рече дека непосредно пред да заминат на гробиштата, еден од неговите чичковци забележал дека бебето мрда со главата и ги известил присутните.

„Потоа отидовме да ја провериме и срцето ѝ чукаше“, додал таткото кој веднаш го однел бебето во болница.

Кога таткото на бебето го прашал што се случило, директорот на Регионалната болница во Сиудад дел Есте, Федерико Шредел, не ја исклучил можноста дека се работело за катаплексија.

„Поради состојбата со предвремено раѓање, тоа може да се случи, практично пациентот останува без знаци на живот“, додаде специјалистот и предупреди дека ваков случај може да се случи еднаш на секои пет милиони раѓања.

Исто така, Пабло Лемир, директор на судска медицина на Министерството за правда во Парагвај, исто така објасни дека тоа може да биде катаплексија или синдром на „очигледна смрт“.

„Нема чукање на срцето, нема дишење, телото е опуштено, бледо, станува сино или виолетово и обично се решава спонтано и необјасниво“, изјави тој за парагвајскиот медиум ABC Colors.

Според експертот, бебето било родено предвреме и тоа ги исклучило опциите за лекарите.

„Во 26-та недела од бременоста и со таа тежина, белите дробови не се подготвени да бидат надвор од матката, ниту пак нервниот систем е правилно развиен“, рече тој.

Од друга страна, роднините не исклучуваат „божествена интервенција“ и тврдат дека девојчето, сепак со резервирани прогнози, ќе се вика Милагрос де Жезус, што во превод значи „Чудо Исусово“.

Момче падна од 40 метри висок гребен во Италија- пријателите немоќно гледале (ВИДЕО)

Момче (14) од Арика, Италија, доживеа трагична судбина кога со другарите го посети езерото Неми, не сфаќајќи дека ќе падне од дрво по стрмна карпа од 40 метри и ќе загине.

Тој наводно се одвоил од својата група пријатели и се обидел да стигне до највисоката точка на Виа Перино, но гранката од дрвото на која се качувал се скршила и момчето се превртело врз карпата, објави Мирор.

Тинејџерот паѓал над 30 метри, а неговите пријатели беспомошно гледале и веднаш го вклучиле алармот.

Пожарникарите од Неми и карабинерите веднаш пристигнале на местото на настанот, но не можеле ништо да му направат на момчето, освен да констатираат смрт.

Телото е пренесено во болницата Кастели во Арикио, а потоа во Институтот за судска медицина во Рим.

Брутално убиство во Њујорк: Во фрижидер е пронајдена отсечена човечка глава и делови на тело

Маж од Њујорк е обвинет за убиство откако во фрижидерот на неговиот стан во Бруклин биле пронајдени човечка глава и делови од телото, соопшти денеска полицијата.

Николас Мекги (45) е уапсен во четвртокот попладне и обвинет за грабеж, криење на човечко тело и компромитирачки докази, соопшти њујоршката полиција, пренесува Ен-Би-Си Њуз.

Посмртните останки на 40-годишниот Кошин Гелцер биле пронајдени на 22 јануари во станот што Мекги го делел со Хедер Стајнс (45), која исто така е уапсена за криење на човечки труп.

Полицајците рекоа дека одговориле на повикот од станот и пронашле повеќе црни кеси со делови од тело во фрижидерот и замрзнувачот.

Според кривичната пријава, лекарите подоцна го идентификувале Гелцер преку отпечатоци од прсти.

Полицијата денеска не соопшти повеќе детали за случајот, ниту пак како и кога е убиен Гелцер.

притисни ентер