Во нивната ресоцијализација треба да се вклучат повеќе домашни институции, смета безбедносниот аналитичар Благоја Марковски. Вели дека најопасни или т.н темприрани бомби остануваат оние кои на Блискиот исток војувале од идеолошки причини.

Вчера кривичниот суд изрече 9 години затвор за Сафет Рамадани како припадник на терористичката организација Исламска држава, но и како организатор на останатите шестмина македонски државјани да заминат во Сирија - Елмедин Османи, Ахмед Џенгис, Орхан Жупани, Буњамин Фето, Ибрахим Шабани и Алмир Миртовски.

Поради учество како борци на ИСИС во војните во Сирија и Ирак се осудени на по шест години затвор.Канал 5 лани дојде до ексклузивни сведоштва на дел на сега осудените, но не сакаше да го открие нивниот идентитет поради безбедносни причини. Раскажаа дека биле инспирирани од Светата војна но и за она што го виделе и доживеале на сирискиот фронт.

Со сега седуммината осудени, досега 30 лица се казнети за учество странски паравојски откако со измените на КЗ се воведе ова кривично дело. Но има и осуденици кои веќе ја издржаа затворската казна и сега се на слобода.

Во јавноста остана запаметен скопјанецот Стефан Стефановски кој со примањето на исламот стана Суфијан. Откако призна вина во 2016та доби две годишна казна затвор, која ја издржа и сега е на слобода.

Сепак во затворите во земјава се уште нема посебни програми за ресоцијализација на повратници. Од Упрвата за извршување на санкции велат дека проектите се во завршна фаза па се очекува наскоро да се спроведат.