Ова е честа пракса во повеќе клиники во Скопје, велат граѓани што се обратија до редакцијата, кои се здравствено осигурани, но се плашат јавно да говорат. Иако законите овозможуваат на поискусни лекари со успешна работа ова да го прават како дополнителна дејност, останува отворено прашањето дали се контролира колку операции вака се извршуваат и има ли злоупотреби, со оглед на тоа што термини за на државно ослободуваат токму специјалистите?
Инаку, на последната прес-конференција министерот Фатмир Меџити на прашање на Канал 5 дали знае за евентуални злоупотреби одговори дека никој не пријавува.
-Ајде пријавете која е таа клиника и јас одма ќе пратам инспекција? Јас да пријавувам? Сакате да кажете дека досега никој не пријавил? Апсолутно не, во мојот говор кажав има милион дефекти, дури и кај мене има.... Дека има, има, имало и во минатото, ама целта е да ги минимизираме проблемите.--Фатмир Меџити – Министер за здравство.
Дека слабо има термини потврдува и пребарување на алатката „Мој термин“ што секој може да ја отвори за да се обиде да најде специјалист.
Професорот Д-р Драган Даниловски, кој е и поранешен министер за здравство за Канал 5 вели дека во законот има ограничувања за докторите, кој лекар може и колку операции смее да врши дополнително, но тоа мора да се контролира.
-Се чини дека контрола нема. Јавна тајна е дека не е проблем само наведувањето на пациенти да се оперираат приватно во државна болница, туку и тоа што јавна тајна е дека некои бараат пари од пациенти кои се закажани за интервенција во регуларни термини. За жал, ова не изненадува бидејќи целото општество претставува затворен систем на врзани садови, па промените во еден сегмент не може да не се одрази во сите други сегменти, па и во здравството. Се наоѓаме во криза на системот на вредности, мислам дека тоа има рефлексија во здравствениот систем.- Проф. Д-р Драган Даниловски – Поранешен министер за здравство.
На прашања на Канал 5 од Министерството за здравство дали се вршат контроли, тврдат дека има. Инспекција сега се прави согласно Законот за здравствена заштита, со цел навреме да бидат обезбедени потребните термини по апарат и специјалност, за да се оптимизира текот на работата, како за дијагностика, така и за операции.