Македонија

Хоџа – Ахмети: Нема суштински разлики меѓу економските програми на ДУИ и СКСЗМ

Владеење на правото, транспарентност и отчетност, намалување на нерамномерниот регионален економски развој, како и намалување на невработеноста.

Тоа се клучните столбови на економската плтаформа на Стопанската комора на северозападна Македонија (СКСЗМ) што денеска беше презентирана пред раководството на ДУИ.

Членките на Комората на средбата укажаа дека бараат и максимална нивна вклученост при донесувањето на законите.

Посебен акцент во разговорите беше ставен на инфраструктурното уредување на зоната Визбегово, на изградбата на автопатот Скопје – Блаце, како и на отворањето на царинскиот терминал во Јажинце.

Како што изјави претседателот на СКСЗМ, Неби Џоџа, во пресрет на предизборниот период пракса е Комората да остварува консултативни средба со политичките партии.

Лидерот на ДУИ, Али Ахмети ја оцени средбата како задоволителна и рече дека нема суштински разлики меѓу Платформата на СКСЗМ и економската програма на ДУИ.

-Уште еднаш апелирав до Комората за комуникација, соработка и идеи во сите области поврзани со развојот на земјата, така што останува сите покренати прашања да бидат интегрирани во програма со која ќе бидат согласни страните, истакна Ахмети.

Минатата недела СКСЗМ во своите простории одржа работен состанок и со претставници на Алијанса за Албанците, а претходно имаше средба и со економскиот тим на СДСМ, предводен од Зоран Заев.

Шоу биз

Ева Лонгорија блесна на црвениот тепих во Кан, облечена во фустан со бисери

Актерката Ева Лонгорија блесна на црвениот тепих на Канскиот филмски фестивал. Лонгорија присуствуваше на премиерата на „Kinds Of Kindness“, со Ема Стоун и Џо Алвин во главните улоги.

Таа носеше блескав фустан со бисери и кристали создаден од модниот дизајнер Ели Сааб. Голиот грб и деколтето го истакна со фустанот. Заедно со оваа модна комбинација, Лонгорија реши да ја обликува косата во светли бранови. Таа со својот изглед ги привлече сите погледи и внимание на фотографите.

Лонгорија на премиерата на филмот „Kinds of Kindness“ пристигна во друштво на нејзината колешка, актерката Ајшварија Раи Бачан, која исто така воодушеви од модната комбинација.

Ева привремено се сели во Шпанија со нејзиниот сопруг Хозе Бастон и синот Сантијаго, неодамна објави „ Page Six“.

„Таа ќе поминува многу време таму бидејќи има проекти за целата втора половина од годината“, изјави извор за „Page Six“.

Ева има шпанско државјанство и куќа во Марбела. Нејзиниот сопруг и таа купија викендица таму на почетокот на 2023 година. „Тоа е мојата оаза, мојот рај“, изјави актерката за време на интервјуто за „Hello!“ во јануари 2024.

„Кога не сум тука, работам без престан“, додаде таа.

Извор: Индекс.хр

Фудбал

Ројс го постигна својот 100-ти гол за Борусија на домашен терен во неговиот последен настап

Фудбалерот од средниот ред на Борусија, Марко Ројс постигна гол на денешниот натпревар од 34. коло од Бундеслигата со Дармштад, кој се играше на стадионот „Сигнал Идуна Парк“ во Дортмунд.

Триесет и четиригодишниот фудбалер упати прецизен удар во противничкиот гол во 38. минута од натпреварот. Ова е негов јубилеен, 100. гол на домашните натпревари на Борусија.

Ројс имаше и асистенција на овој натпревар.

Германскиот играч за врска го одигра последниот натпревар со Борусија во Бундеслигата. Тој ќе го напушти тимот како слободен играч во јули. /МИА

Фудбал

Баер го победи Аугсбург и ја заврши сезоната во Бундеслигата без пораз

Баер попладнево оствари домашна победа над Аугсбург (2:1) во натпреварот од 34. коло на германскиот фудбалски шампионат.

За домаќините погодија Виктор Бонифас и Роберт Андрич, голот за Аугсбург беше дело на Мерт Комура.

Избраниците на Чаби Алонсо, кои рано станаа германски шампиони, Бундеслигата ја завршија непоразени, освојувајќи 90 бода. Серијата без пораз на Леверкузен во сите натпреварувања достигна 51 натпревар.

Аугсбург заврши 11-ти со 39 бодови./МИА