Хасани: Можеме и мораме подобро

Македонскиот фудбалски репрезентативец Ферхан Хасани кој заздравува од тешката повреда на вкрстените лигаменти претрпена на квалификацискиот натпревар против Украина во Скопје верува дека репрезентацијата има потенцијал за подобри резултати.


- Никој не може да ме убеди дека ова е реалната слика на нашиот фудбал. Свесен сум дека има многу недостатоци во сите сегменти на овој спорт, но сепак моменталниот пласман не го отсликува реалниот квалитет. Можам само да кажам дека секој кој е поврзан на било каков начин со фудбалот треба да чувствува одговорност и посветено да работи за да излеземе сите заедно од оваа ситуација, додава Хасани.

Повредата дојде во незгоден момент кога Хасани беше во одлична форма и вистински предводник на тимот на Шкендија.

- За еден иргач нема полошо од тоа да остане надвор од терените поради повреда. Но, исто така јас сум свесен дека овие работи се случуваат во фудбалот, колку и да е тешко да се прифатат. Бев во добра форма, повредата дојде во незгоден момент, но гледам позитивно на работите и сконцентриран сум на процесот на рехабилитација, изјави Ферхан Хасани за веб страната на ФФМ.

Популарниот „Буба“ се осврна и на двата контролни натпревари со новиот селектор.

- Имаме нов селектор кој најдобро ги знае приликите во домашниот фудбал и секако дека се очекува да помогне за враќање на позитивните резултати. Првиот контролен натпревар под негово водство покажа како треба да играме во иднина, а вториот како не треба. Убедливата победа над Црна Гора треба да биде мотив и показател на патот кој треба да го следиме. Немаме време за обвинувања и барање на виновници. Сите заедно да се обединиме и со напорна работа да бараме успеси. Фудбалот е магија, спорт кој зближува и ако ги препознаеме вистинските вредности, сигурен сум дека ќе постигнеме подобри резултати и ќе уживаме преку спортското натпреварување, додава Хасани.

Фудбалерот на Шкендија упати апел и до публиката да се вклучи во подобрување на атмосферата кога игра националниот состав.

- Јас имам еден апел до сите искрени љубители на фудбалот, без разлика на се, нивното место е на трибините. Сите знаеме дека кога би биле во ситуација да се квалификуваме на едно големо натпреварување трибините би биле преполни, но кога се победува полесно им е и на играчите. Тогаш секој ужива за себе, фудбалерите со игрите, а навивачите со победите. Клучно е да се подржува националниот тим и тогаш кога не ни оди. Како и да е, ние не можеме да излеземе од оваа ситуација без поддршката на навивачите, кои на крајот од денот треба до доаѓаат на стадион само за љубовта која ја чувствуваат за државата, нагласи Хасани.

Ужас во Аризона: Татко си ги пронашол двете тригодишни близначки удавени во базен

Полицијата ги објави имињата на близначките кои трагично загинаа откако нивниот татко ги извлекол нивните безживотни тела од базенот во дворот.

Тригодишните девојчиња, Валентина и Пеналапи Руиз, починале во четвртокот во болница во Феникс, Аризона, соопштија официјални лица, пишува Daily Mail..

„Прелиминарните информации сугерираат дека дошло до случајно давење“, соопшти вчера полицијата.

„Во овој момент, нема ништо што откриле иследниците што изгледа сомнително“, рече пожарникарот на Феникс, Роб Мекдејд, за таткото на близнаците кој се јавил на 911.

Мекдејд додаде дека децата биле под вода „неодредено време“ пред да пристигне помошта околу 15:30 часот во четвртокот.

Девојчињата биле итно пренесени во блиската болница каде што биле прогласени за мртви, соопштија официјални лица.

Воздушните снимки од домот покажале базен во облик на бубрег што немал ограда околу него.

Расте бројот на жртвите во поплавите во Бразил- најмалку 57 загинати, 67 исчезнати (ВИДЕО)

Бројот на загинати од поројниот дожд во јужната бразилска држава Рио Гранде до Сул се искачи на 57, соопштија локалните власти, додека десетици се уште не се пронајдени, пренесува Ројтерс.

Цивилната заштита на Рио Гранде до Сул соопшти дека 67 лица се уште се водат како исчезнати, додека повеќе од 32.000 луѓе се раселени поради невремето, кое зафати речиси две третини од 497-те градови во државата, која граничи со Уругвај и Аргентина.

Поплавите уништија патишта и мостови во повеќе региони во земјата. Невремето предизвика и лизгање на земјиштето и делумно уривање на брана во мала хидроцентрала. Друга брана во градот Бенто Гонкалвес исто така е во опасност од уривање, соопштија властите.

Во Порто Алегре, главниот град на Рио Гранде до Сул, езерото Гуаиба се излеа, поплавувајќи ги улиците. Меѓународниот аеродром во Порто Алегре ги укина сите летови на неодредено време.

Во следните 36 часа се очекуваат врнежи од дожд во северните и североисточните предели на државата, но количината на врнежи се намалува и би требало да биде далеку под врвот забележан претходно оваа недела, соопшти државната метеоролошка служба.

Сепак, „нивото на водата во реките треба да остане високо неколку дена“, изјави денеска гувернерот Едуардо Леите во видеото на неговите социјални мрежи, додавајќи дека е тешко да се каже колку долго.

Рио Гранде до Сул се наоѓа на географската точка меѓу тропската и поларната атмосфера, што создава метеоролошка шема со периоди на интензивен дожд и други со суша.

Локалните научници веруваат дека оваа шема се интензивира поради климатските промени.

Обилните дождови веќе го погодија Рио Гранде до Сул во септември минатата година, кога екстратропски циклон предизвика поплави во кои загинаа повеќе од 50 луѓе. Ова се случи по повеќе од две години постојана суша поради феноменот Ла Ниња, со само слаби дождови.

Најбогатата актерка на светот има 3 милијарди долари, но ретко кој ја знае (ВИДЕО)

Кога ќе помислите на најбогатите актерки во светот, веројатно ви паѓаат на ум познати имиња како Џулија Робертс, Сандра Булок, Анџелина Џоли или Џенифер Анистон, но големи се шансите никогаш да не сте го чуле името на најбогатата актерка на светот.

Имено, оваа титула ѝ припаѓа на американската актерка Џејми Герц, чие богатство се проценува на 3,2 милијарди долари. Ако се прашувате која е, не сте единствените затоа што изгледа дека луѓето не можат да се сетат на неа.

58-годишната ѕвезда ја започнала својата кариера во 1981 година со улога во „Бескрајна љубов“ и оттогаш се појавила во голем број филмови, вклучувајќи ги „Изгубените момчиња“, „Твистер“, „Крстопат“, „Помалку од нула“, „Квиксилвер“ и „Шеснаесет свеќи“.

Покрај тоа, таа се појави во хит сериите Seinfeld, The Neighbors, Modern Family и This is Us, а неодамна глумеше во филмот „I Want You Back“ од 2022 година, но таа ретко се појавува на екранот.

Сепак, нејзиното богатство не се должи само на нејзината актерска кариера. Актерката е во брак со милијардерот и инвеститор Тони Реслер, со кого е косопственик на НБА тимот Атланта Хокс. Имаат четири деца, а интересно, кога се венчале во 80-тите, Џејми била хранителка бидејќи компанијата на нејзиниот сопруг пропаднала, но тој подоцна се опоравил и заработил милијарди.

Инаку, официјално најбогатата актерка на светот е холивудската ѕвезда Дина Мерил, чие богатство се проценува на 5 милијарди долари. Мерил починала во 2017 година, со што Џејми сега стана најбогатата жива актерка на светот.

притисни ентер