Украина е подготвена да го пополни „секое празно место“ во Европската унија (ЕУ) и НАТО доколку Унгарија одлучи да се повлече од членството во овие организации за да се приклучи на блоковите предводени од Русија, соопшти денеска украинското Министерство за надворешни работи.

„Украина би била подготвена да го пополни празното место во ЕУ и НАТО доколку Унгарија одлучи да го напушти во корист на членството во евроазиската Заедница на независни држави или на Организација на Договорот за колективна безбедност“, се наведува во соопштението на украинското Министерство.

Коментирајќи ја изјавата на унгарскиот министер за надворешни работи Петер Сијарто дека одлуката на Украина да го прекине транзитот на руски гас преку нејзина територија ги зголеми цените, украинското министерство рече дека овие изјави се дел од „политички мотивирана информативна кампања насочена кон домашната потрошувачка“, потсетувајќи дека европската Комисијата изјави дека одлуката нема негативно влијание врз енергетската безбедност на ЕУ или потрошувачките цени.

„Единствената причина за предизвиците на европскиот енергетски пазар отсекогаш била Русија“, се наведува во соопштението за печатот, обвинувајќи ја Москва дека со децении ја користи енергијата како оружје, како и дека уценува и ја поткопува енергетската безбедност. Во соопштението се додава дека Унгарија треба отворено да признае дали нејзин приоритет е зајакнувањето на Русија пред ЕУ и САД.

На 1 јануари истече петгодишниот договор меѓу Москва и Киев за транзит на руски гас преку Украина, по што Украина одби да го продолжи договорот „во интерес на националната безбедност“.

ЕУ ги започна пристапните преговори со Украина во декември 2023 година. Киев поднесе барање за членство во НАТО во септември 2022 година, неколку месеци откако Русија започна „специјална воена операција“ во Украина./MИА

Безбедносно - разузнавачките институции не се реформирани, а во нивните рамки се направени сериозни злоупотреби кои мора да бидат предмет на истрага од страна на Јавното обвинителство. Овие злоупотреби се потврда за користење на институциите за следење и негативно етикетирање на личности, како и за обиди за спречување на промена на власта.

Во контекст на наводите објавени од премиерот Христијан Мицкоски за фабрикувани конструкции за пара-полициски вооружени формации, јавно го повикувам Обвинителството да истражи зошто ваквите информации не беа доставени до МВР, иако тоа експлицитно го побаравме во неколку наврати. Имено, по преземањето на функцијата технички министер, побарав писмено, но и во рамки на работен состанок, од надлежните институции да достават информации за потенцијални безбедносни ризици во пресрет на одржување на изборите. Вакви информации, до мене, МВР, но и до владата и Советот за координација на безбедносно-разузнавачката заедница во тој период воопшто не беа доставени.

Тука се поставува јавно прашањето: доколку институциите располагале со такви информации за сериозни безбедносни закани, зошто истите не беа доставени до надлежните институции во исклучително сензитивниот предизборен период и покрај тоа што истото во неколку наврати беше побарано од моја страна? Неопходно е јавното обвинителство да отпочне активности за решавање на овие отворени прашања и утврдување на сите инволвирани лица и незаконски дејствија.

Центар за комуникации на ВМРО-ДПМНЕ

Последните податоци говорат дека следниот филм наскоро ќе го снима во Хрватска, пренесува „Варајети“ (Variety).

Хамер, имено, ја добил главната улога во трилерот „Мрачниот витез“ на германскиот режисер Уве Бол. Снимањето треба да почне во Хрватска на 27 јануари.

Претходно, обожавателите ќе може да го погледнат и во претстојниот каубојски филм „Граничен сад“ (Frontier Crucible), во режија на Тревис Милс. Филмот е во постпродукција, но сѐ уште не се соопштува датумот на киноприкажувањата

Околу обвиненијата, инаку, Обвинителството на Лос Анџелес донесе одлука во негова корист во 2023 година и одби да го обвини за какво било кривично дело. Хамер раскажуваше и дека по обвиненијата за злоупотреба на интернет, добил нагони за самоубиство. Тие беа причина и за неговиот развод, како и за тоа што му било дозволено да ги гледа своите две деца само под надзор.

Инаку, Хамер лани во август тврдеше дека си го продал автомобилот затоа што не можел да плаќа гориво.

Во едно неодамнешно интервју, Хамер изјави дека до пред 4 - 5 години, неговата кариера толку многу напредувала што почнал да одбива работни задачи. /МИА