За сѐ е виновен гасот, односно недостигот на гас предизвикан од актуелната политичка ситуација во која продолжува војната во Украина, а санкциите кон Русија никогаш не биле построги. Доколку ова сценарио се прелее во следната година, Volkswagen лесно може да направи таков драстичен потег.
Преместувањето на производството од матичната земја е само едно од решенијата за кои моментално се разговара во Волфсбург. Доколку се донесе таква одлука, Volkswagen би го префрлил целото производство од Источна Европа и Германија во фабрики на Запад, пред сѐ во Белгија, Португалија и Шпанија, дознава Блумберг.
Русија и Северен тек 1 се главниот извор на гас за германската индустрија, односно беа, додека Русите не го свртеа вентилот. Индустријата веќе трпи одредени последици. Се проценува дека најсериозните проблеми ќе излезат на површина доколку гасот не протече до јуни следната година, велат од Volkswagen.
„Како среднорочно решение, фокусирани сме на поголема локализација, преместување на производствените или технолошки алтернативи, истата воспоставена практика што се применуваше на предизвиците поврзани со недостигот на полупроводници, како и во случај на други проблеми со снабдувањето.“
Фолксваген тврди дека ќе може да го задржи производството во следните шест месеци, но под услов Германија да продолжи да ги пополнува своите резерви кои сега се на 90 проценти. Бидејќи е можно резервите на гас да се намалат во зима, Volkswagen веќе работи на намалување на потрошувачката на гас во согласност со барањата на германската влада за намалување од 20 проценти.
Блумберг нагласува дека Фолксваген е загрижен поради поскапувањето на енергенсите, со што кооперантите сѐ потешко се справуваат. Поради тоа, постои опасност бројни подизведувачи да бидат принудени да го прекинат производството.