Доколку ова откритие биде потврдено, тоа ќе биде првпат луѓето да стапат во контакт, односно да држат и проучуваат објект кој пристигнал од меѓуѕвездениот простор.
Лоеб и неговите колеги ги пронашле овие необични сферули во Тихиот Океан во близина на Папуа Нова Гвинеја, а потрагата по нив била започната откако метеорот CNEOS 2014-01-08 (IM1) се распаднал над областа во 2014 година, кој имал многу необична брзина и затоа го привлекол вниманието на научниците.
Со оглед на тоа што сателитите на американската влада го следеле метеорот додека не се распаднал, Лоеб ја знаел приближната локација на неговиот пад и во јуни оваа година започнал експедиција насочена кон пронаоѓање на остатоците од IM1.
Иако ова е потенцијално големо откритие, научната заедница останува малку скептична, особено затоа што експедицијата е предводена од Лоеб, познат по неговата потрага по интелигентен вонземски живот. Имено, Лоеб во 2021 година го основал проектот Галилео, чија мисија е да бара знаци на вонземска технологија.
Дополнително, Лоеб во своето истражување споменува дека високата содржина на ураниум во пронајдените топчиња може да биде показател дека станува збор за некаква вонземска технологија. Планетарниот научник Моника Грејди од Отворениот универзитет во Велика Британија го коментира откривањето на сферулите во јули, пред објавувањето на прелиминарните резултати од анализата, и рече дека се потребни многу посилни докази за тврдењето дека се работи за вонземски сфери.
„Каков е нивниот состав? Колку години имаат? Можеме ли да ги исклучиме загадувачите од Земјата? Можеме ли да исклучиме фрагменти од вонземски материјал од Сончевиот систем? Најубедлив доказ би бил да се измери староста на сферулите. Ако се постари отколку Сонцето, тоа би значело дека дошле од меѓуѕвездениот простор“, напишала Грејди.
„Знаеме дека метеоритите од нашиот Сончев систем содржат железо и никел. Сферулите очигледно содржат „незначителни“ количества никел, што покажува дека тие речиси сигурно не потекнуваат од метеори во Сончевиот систем. Сепак, ова не докажува дека сферулите доаѓаат од меѓуѕвездениот простор, само ја зголемува веројатноста дека се работи за загадувачи од Земјата“, додава таа.
Прелиминарната анализа на 57 минерални објекти сугерират дека барем некои од нив не припаѓаат на метеори во Сончевиот систем поради нивниот хемиски состав. „Ова е историско откритие. За прв пат луѓето држат во рацете материјал кој доаѓа од голем меѓуѕвезден објект. Исклучително сум задоволен од овие резултати“, рече американскиот претприемач Чарлс Хоскинсон, кој помогна во финансирањето на експедицијата на Лоеб, како што објави Science Alert.
Имено, како што објави Харвард, ситните топчиња (до 1 милиметар во дијаметар) содржат екстремно големи количества берилиум, лантан и ураниум, што е состав на „BeLaU“ кој досега не е виден. Сферулите исто така содржат сооднос на изотоп на железо кои не се наоѓаат на Земјата, Месечината и Марс, што укажува на меѓуѕвездено потекло.
Студијата, Discovery of Spherules of Likely Extrasolar Composition in the Pacific Ocean Site of the CNEOS 2014-01-08 (IM1) Bolide, сè уште не поминала независна рецензија од колегите.