Во соопштението се вели дека суспендирањето на вториот човек во ФИФА, е донесено откако во еден весник беа изнесени сериозни обвинувања против Валке, за тоа дека бил вклучен во шема за продавање на влезници за светските фудбалски првенства, по цена над нивната вистинска вредност.
Французинот Валке (54) на оваа висока функција се наоѓа од 2007 година.

Минатиот месец тој откри дека ја испитува можниста да се кандидира за наследник на претседателот Сеп Блатер, кој во јуни годинава соопшти дека се повлекува од функцијата, само четири денови откако беше по пети пат реизбран на функцијата.

Сега Валке се соочува со формалната истрага на Комитетот за етика во Светската фудбалска федерација.

Жером Валке ги отфрла обвинувањата изнесени во весникот, тврдејќи дека се „фабрикувани“.

Сменувањето на вториот по ранг функционер на ФИФА се случува во време кога организацијата се соочува со најтешките моменти од нејзнината историја, потресувана од скандали и обвинувања за корупција.

Седумина високи функционери на ФИФА во мај годинава беа уапсени во Цирих, непосредно пред Конгресот на организацијата, обвинети од американските власти за примање поткуп и перење пари, а швајцарското обвинителство испитува дали се било регуларно при гласањето за домаќини за наредните две светски првенства во Русија, во 2018 и во Катар, во 2022 година.

За сменетиот генерален секратар Валке се вели дека тој уште од порано беше „под лупа„ осомничен во врска со обвинувањата околу земениот поткуп, при гласањето за организатор за Светското првенство во 2010 година.