Срцевиот застој, за жал, не е ретка појава. Во Европската унија, речиси 350.000 луѓе годишно доживуваат срцев застој. Од тој број, околу 90 отсто од случаите завршуваат фатално. Затоа е многу важно да ги научите основните принципи на кардиопулмонална реанимација (CPR), да обезбедите доволен број на масажи на срцето и веднаш да повикате брза помош, пишува британски Сан.

Се верува дека 70 отсто од случаите на срцев застој надвор од болница, се случиле дома, а половина од овие случаи немале никој присутен кој би им укажал помош. Доколку срцевиот застој се случи надвор од болница и се изврши кардиопулмонална реанимација, стапката на преживување е сепак ниска, но значајна и изнесува 10,8 проценти. Доколку дојде до срцев застој во самата болница, стапката на преживување е 25,5 проценти. Ако не се примени CPR, мозочната смрт ќе се случи за помалку од 10 минути.

CPR вклучува група на интервенции кои се вршат за да се обезбеди оксигенација, т.е. транспорт на кислород до клетките и циркулација, т.е. кружење крвта во телото за време на срцевиот застој.

Реанимацијата се користи за повторно враќање на виталните функции кај лицето кое доживеало срцев застој или застој на дишењето. Главната цел е да се пренесе дополнителна количина кислород до мозокот, срцето и другите витални органи додека со сложени медицински постапки повторно не се воспостави адекватна срцева акција и спонтано дишење. Реанимацијата се врши така што се изведува силен притисок на градната коска од 100 до 120 пати во минута. Најважно е брзата помош да пристигне на време.

Како да препознаете акутен срцев застој?

Губење свест

Престанок на дишењето

Губење на пулсот во големите крвни садови (вратот, бутовите)

Промена на бојата на кожата и на видливата слузокожа

Широки зеници (ова спаѓа во сигурни знаци)

-Срцевиот застој може да му се случи секому, во секое време, и колку побрзо лицето добие компресии на градниот кош (CPR) и дефибрилација, толку се поголеми шансите за преживување. Најлошото нешто што може да го направите при ваков итен случај на срцев застој е да не правите ништо, изјавил д-р Дејвид Бовен, стручњак за реанимација.

Истражувањето објавено минатата година покажа дека 74 проценти од луѓето знаат како да извршат CPR. И покрај ова, само 44 отсто биле доволно способни да изведат реанимација. Откако ќе се јавите на бројот за итни случаи, можете да започнете со компресија на градите.

Рачната реанимација се изведува на следниов начин:

- се вршат компресии во средината на градната коска

- поставете го коренот на дланката на средината на градниот кош, што одговара на долната половина на градната коска

-Другата дланка ставете ја врз дланката поставена на градниот кош и преплетете ги прстите на рацете (важно е притисокот да не е на ребрата)

- притиснете ја градната коска па ослободете го притисокот без да ги отстранувате рацете

- компресиите и повторувањата треба да бидат во ист ритам

- ритмичкото повторување на компресиите се врши додека пациентот не се освести или не пристигне брзата помош

-не вршете притисок врз абдоменот или долниот дел од градната коска, затоа што е важно рацете да бидат во средината на градната коска.

Внимателно следете ги упатствата на центарот за брза помош додека не пристигне амбулантното возило. Не е сеедно, вака можете да спасите живот.

Кај нас дефибрилаторите ги користат оспособени стручни медицински лица. Станува збор за медицински уреди кои создаваат електричен удар во срцето, а се користат за срцев застој. Дефибрилаторите не се користат откако срцето ќе престане да работи. Всушност, силната електрична струја за кратко време ја запира работата на срцето, кое работи неправилно или е блиску до застој. Ако активирањето на срцето со дефибрилација е успешно, нервните клетки од мозокот до запреното срце веднаш продолжуваат да испраќаат нови сигнали до срцето, па тоа продолжува да работи како порано. Откако срцето ќе застане, употребата на дефибрилатор е бескорисна.

Дефибрилаторите се користат од 1958 година, а нивната употреба е откриена случајно. Лекарите од болницата Џон Хопкинс во Балтимор, САД, во лабораторија испитувале како реагира срцето на куче на струен удар. Кога го извеле ова, забележале дека дошло до пулсирачки бран и лекарите сфатиле дека на овој начин можат да обезбедат делумно функционирање на крвотокот.

Извор: https://srecna.republika.rs/zdravlje/odrasli/16760/kako-otpoceti-reanimaciju-kod-srcanog-zastoja