Министрите за здравство на земјите членки на Европската унија на денешната средба во Луксембург усвоија препорака со која бараат да се поттикне помала потрошувачка на антимикробни лекови и да се намали потрошувачката на антибиотици за 20 отсто до 2030 година.
„Не можеме да ја игнорираме смртоносната закана што микроорганизмите отпорни на лекови ја претставуваат по здравјето на луѓето. Борбата против антимикробната резистенција беше клучен приоритет на шведското претседателство, а денешната препорака им дава на земјите од ЕУ алатки за следење и намалување на потрошувачката на антимикробни средства“, рече Јакоб Форсмед, шведскиот министер за социјални работи и јавно здравје.
Здравјето е ексклузивна надлежност на земјите-членки, затоа Советот на ЕУ не може да издава обврзувачки регулативи, туку препораки што земјите-членки можат да ги спроведуваат на доброволна основа.
Препораката е насочена кон превенција и контрола на инфекции, надзор и мониторинг, иновација и достапност на ефективни антимикробни средства, претпазлива употреба и соработка меѓу земјите-членки и на глобално ниво.
Во соработка со Европскиот центар за превенција и контрола на болести (ЕЦДЦ), препораката поставува неколку цели на ЕУ кои треба да се исполнат до 2030 година.
Станува збор за намалување од 20 проценти на вкупната употреба на антибиотици кај луѓето, ефикасна употреба на антибиотици, така што најмалку 65 проценти од вкупната употреба на антибиотици кај луѓето е ефективно и намалување на инфекциите со три клучни бактерии отпорни на антибиотици, што најмногу се однесува на болниците.
Антимикробните средства се лекови од критична важност. Меѓутоа, поради нивната прекумерна и неправилна употреба со текот на годините, антимикробната отпорност е зголемена, што значи дека антимикробните средства ја губат својата ефикасност. Затоа е сè потешко или невозможно да се лекуваат инфекциите.