Овие временските услови, со подолго отсуство на врнежи, резултира со намалување на влагата во почвата што може да влијае негативно кај сите земјоделски култури, велат агрометеоролозите.

Според нив, секоја култура во различни фази од развојот има потреба од вода.

-Кај овошните видови, овој период, почетокот на ноември, е најдобар за садење садници. При есенското и зимско садење, потребно е садницата да се загрнува со 30 сантиметри почва за заштита на коренот од мраз. Големо внимание треба да се обрне и на здравствената состојба на посадочниот материјал, особено да не е заразен од карантински болести и штетници. Треба да бидат добро развиени, здрави, квалитетни садници од бараните сорти и подлоги, истакнуваат агрометеоролозите од УХМР.

Некои доцни сорти на овошни видови, како дуњите, јапонското јаболко и калинката, се во фаза на берба.

-Овошните култури имаат потреба за вода и по бербата наесен, заради кондиционирање и презимување без оштетувања од ниски температури и заради формирање родни пупки за идната година. За постигнување висок и квалитетен принос низ цела вегетација, почвата треба да има доволно количество лесно достапна вода, нагласуваат агрометеоролозите.

Тие порачуваат дека кај останатите култури треба да продолжи примената на потребните агротехнички мерки: наводнување, обезбедување хранливи материи за поголема отпорност кон зимски мразеви, употреба на сертифициран семенски материјал со добри квалитетни сортни карактеристики и добра здравствена состојба, употреба на квалитетно ѓубриво,...

Од денеска, според прогнозите на УХМР, времето ќе биде променливо облачно и постудено. Утре наместа се очекуваат и повремени врнежи. Минималната температура ќе се движи од -6 до 5 степени на повисоките места, а максималната ќе биде од 9 до 20 степени.

Од новоформираното јавно претпријатие - Регионален центар за згрижување на бездомни миленици и ветеринарно здравство Стационар Шепа Кавадарци за МИА велат дека на тој начин се очекува да се реши долгогодишниот проблем со бездомните кучиња со кој се соочува регионот. Само во Кавадарци, бројот на бездомни кучиња е над 500, а само околу 13 проценти од нив, засега се соодветно и стручно хумано третирани.

Од Центарот истакнуваат дека тоа е висока популација, која најчесто потекнува од неодговорното сопствеништво. Со најавените активности, бездомните кучиња хумано ќе се третираат, а се очекува да се спречат и каснувањата на луѓе и пренесувањето на заразни болести.

Во програмата за хуман третман и благосостојба на бездомни животни на подрачјето на општина Кавадарци е објаснет начинот на решавање на проблемот со бездомните кучиња во деветте општини од Вардарски регион, преку воспоставување на систем за контрола на популација на кучиња согласно на законските прописи. Се нагласуваат и активностите за поттикнување на одговорното сопствеништво, како и неселективното казнување на несовеснитеграѓани.

Од Центарот истакнуваат дека програмата се базира на методата заловување, стерилизирање, вакцинирање и вдомување или враќање, што е востановена како единствена ефикасна стратегија и од страна на Светската здравствена организација.

- Поради порастот на популацијата, за најбрз загарантиран ефект ќе се направи план за масовен хуман третман на бездомните кучиња, во рамки на општината во период од шест до 12 месеци. Се предвидува дека со 75 проценти стерилизирани или кастрирани единки, процентот на напредок на популацијата станува нула проценти, по што бројот на бездомни кучиња природно почнува да опаѓа, велат од Центарот.

Оттаму појаснуваат дека престојот на кучињата во прифатилиштето нема да биде подолго од 30 дена.

Финансирањето е од страна на општините Кавадарци, Неготино, Велес, Свети Николе, Чашка, Демир Капија, Градско, Лозово и Росоман, како и од донации.

Целосната финансиска конструкција на проектот изнесува 14. 892.319 денари. Дел од средствата во висина од 5.119. 385 денари се обезбедени од Швајцарска амбасада, а 9.772.933 денари од Министерство за локална самоуправа. Деветте општини во Вардарскиот плански регион усвоија модел за управување и организациона поставеност на прифатилиштето на регионално ниво, преку кој секоја општина обезбеди дополнителни средства, за оперативни трошоци за работење на Центарот.

Градоначалникот на Кавадарци Митко Јанчев во март при посетата на тогашниот министер за локална самоуправа Ристо Пенов, рече дека капацитетот на објектот е околу 60 кучиња и има услови за згрижување по сите стандарди.

- Секое куче бездомник ќе биде згрижено, чипирано, кастрирано и социјализирано, изјави тогаш Јанчев.

Локацијата на објектот наменет за деветте општини, е во населбата Глишиќ. Објектот се протега на површина од 5.470 квадратни метри.

Во Скопје променливо облачно и постудено со сончеви периоди. Ќе дува слаб до умерен ветер од северен правец. Минималната температура ќе се спушти до -1, а максималната ќе достигне 12 степени.

Според УХМР, следува период на променливо облачно и постудено време со повремени локални врнежи од дожд, а на повисоките планини ќе има услови за провејување на слаб снег.