Ова го истакна министерот за одбрана Талат Џафери при денешната посета на новопримените професионални војници кои го посетуваат курсот за основна борбена обука во центарот за обука „Пепелиште“.

Воедно, министерот Џафери потсети дека оваа класа професионални војници се разликува од досегашните по тоа што во работниот однос со Армијата влегува со целосна егзистенцијална сигурност за себе и за своето семејство, имајќи ги предвид законските дополнувања со кои професионалните војници по 45-тата година од животот ќе продолжат да работат во државната служба.

Началникот на Генералштабот на АРМ, генерал потполковник Горанчо Котески, изрази очекување дека професионалните војници ќе се оспособат за основите на тоа што значи војничката професија, што е потребно за нивното идно доусовршување.

- Основно е вие меѓусебно да се запознаете, да се почитувате, да бидете јак војнички колектив кој дише заедно, а заедно се соочува и со истите предизвици. Најважно е војниците да го сочуваат своето здравје бидејќи тие и требаат на Армијата здрави, физички подготвени, психички стабилни и подготвени да слушаат наредби, порача генерал Котески.

Челниците на Министерството и на Армијата ги разгледаа и просториите во кои се сместени професионалните војници, а воедно беа сведоци и на показната вежба „тим во напад во денски услови“.

Од 168-те професионални војници 11 се припаднички на понежниот пол. Тие се примени на последниот јавен оглас, а во текот на едномесечниот основен курс на „Пепелиште“, се запознаваат со задачите и обврските кои произлегуваат од службата во Армијата на Република Македонија, како и со основните војнички вештини и борбената обука. Во рамки на курсот ќе бидат теоретски и практично тестирани со што ќе се потврди нивното познавање на сите елементи кои се дел од професијата војник во Армијата на Република Македонија. /МИА