Со тесно водство од 30,7 наспроти 27 проценти партијата на Бојко Борисов ГЕРБ победи на вонредните избори пред Социјалистите на Коалицијата за Бугарија на Сергеј Станишев .
Протурската партија ,,Движење за права и слободи “ освои 10.58 проценти , а ултра десничарите од ,,Атака” 7,38 проценти од гласовите. Овие четири партии влегуваат во парламентот , но формирањето стабилна влада ќе биде тешка задача .
Според бугарските аналитичари мала е веројатноста за формирање функционална коалиција. Според опозиционерот Станишев направен е упад во чесните и слободни избори преку манипулации , притисок врз гласачите, купување гласови со што се доведува во опасност релевантноста на изборните резултати.
Да немало контролирани избори , ГЕРБ би била второрангирана партија , смета Станишев. Тој повтори дека Бугарија пропаѓа во економска криза со долг од 14 милијарди лева , кој бил за четири милијарди помал пред четири години.
И покрај калкулациите за коалиција со ГЕРБ , ултрадесничарите на Волен Сидеров од Атака нема да коалицираат со ниедна партија.
Изборите во Бугарија сепак минаа во сенка на скандалите, најпрвин со 350 – те илјади фалсификувани гласачки ливчиња , со бојкотот на Македонците , но и со апсењето на двајца мажи , кои вчера биле фатени во Бургас со список од 120 имиња , за чии гласови пред камерите на националната телевизија признале дека ќе заработеле 6 илјади лева или околу 3 илјади евра.