Бајден: Работиме на прекин на огнот во Газа за најмалку шест недели

САД работат на преговори за прекин на огнот во Појасот Газа за најмалку шест недели, како дел од поширок договор кој ќе вклучи ослободување на заложниците, изјави американскиот претседател Џо Бајден.

САД работат на преговори за прекин на огнот во Појасот Газа за најмалку шест недели, како дел од поширок договор кој ќе вклучи ослободување на заложниците, изјави американскиот претседател Џо Бајден за време на неговата средба со јорданскиот крал Абдула Втори.

Бајден, исто така, рече дека цивилите кои се кријат во јужниот град Рафа, на границата со Египет, „мора да бидат заштитени“, бидејќи Израел размислува за копнена инвазија на густо населената област каде што се заглавени повеќе од еден милион Палестинци.

Лев: Не сум заинтересиран да работам во Германија

Поранешниот селектор на германската фудбалска репрезентација, Јоаким Лев ја отфрли можноста за назначување за тренер на Баерн.

-Постојат различни причини за ова. Од една страна, Баерн не е заинтересиран за мене, од друга, јас самиот не сум заинтересиран да работам за Баерн. Долго бев селектор на германската репрезентација, работа тука за мене не доаѓа предвид. Патував низ земјата 17 години, ги посетив сите стадиони и добро ги познавам клубовите. Така што во Германија немам мотивација, изјави 64-годишниот поранешен тренер во интервју за „Билд“.

Лев во текот на својата тренерска кариера од позвучните клубови има работено во Австрија Виена, Карлсруе, Фенербахче и Штутгарт.

Во моментов тренер на Баерн Минхен е Томас Тухел, но по завршувањето на сезоната 2023/24, Баварците ќе имаат нов предводник. /МИА

Почина Славе Сирачевски, познат угостител и сопственик на Аурора

Почина Славе Сирачевски, сопственикот на туристичката агенција Аурора Турс, угостителски објект на езерото Козјак и на еден од најубавите хотелски ресорти во Македонија, Аурора Берово.

Веста на фејсбук ја објави поранешниот директор на Агенцијата за туризам Љупчо Јаневски.

„Македонскиот туристички сектор загуби еден од креаторите и визионерите на македонскиот туризам.

Славе Сирачевски со Аурора Турс и уникатните концепти на Хотел Аурора Берово и Аурора Козјак успеа да докаже дека вложувањата за рурален туризам е голема можност во Македонија и пример за регионот!

Во мое лично име изразувам сочуство на семејството!

Благодарам Славе за многуте совети кои ги сподели со мене и помогна во мојот кариерен развој и развојот на македонскиот туристички сектор.

Почивај во мир Славе“, напиша на својот статус Љупчо Јаневски.

Сочувство до семејството Сирачевски од целиот тим на Канал 5.

Саливан: САД, Израел, Египет и Катар се договорија за „контурите“ на договорот за заложници

САД, Израел, Египет и Катар се договорија за „основните контури“ на договорот за заложниците.

Соединетите Американски Држави, Израел, Египет и Катар постигнаа договор за „основните контури“ на договорот за заложниците и привремен прекин на огнот во Појасот Газа, изјави денеска за Си-Ен-Ен советникот за национална безбедност на Белата куќа, Џејк Саливан.

„За договорот сè уште се преговара“, рече Саливан, додавајќи дека се планирани индиректни разговори со палестинското исламистичко движење Хамас, а како посредници ќе бидат Катар и Египет.

Во меѓувреме, израелскиот премиер Бенјамин Нетанјаху рече дека се уште е нејасно дали тековните разговори ќе доведат до договор.

Во интервју за Си-Би-Ес Њуз, Нетанјаху рече дека подоцна денеска ќе се сретне со неговиот тим за да разговара за воениот план за евакуација на палестинските цивили во Газа и операцијата за уништување на преостанатите формации на Хамас.

„Ако имаме договор, тој ќе биде малку одложен, но тоа ќе се случи. Ако не се постигне договор, сепак ќе го направиме“, рече израелскиот лидер. /МИА

притисни ентер