Заев не размислува за оставка и предвремени избори

Премиерот Зоран Заев во коментар на барањето на опозицијата за оставка и предвремени парламентарни избори по објавата на случајот „Рекет" изјави деканема намера да размислува  за такво нешто.

– Апсолутно Владата, која го има на чело човекот кој го пријави овој случај, сето тоа го ставам во вода, го ставам на страна, немам намера да размислувам за ниту за оставки, ниту за предвремени избори, изјави Заев, одговарајќи на новинарски прашања за случајот „Рекет",  вечерва на приемот во Клубот на пратеници по повод 18-годишнината од потпишувањето на Рамковниот договор.

Изборите, дополни, се редовни. Реков дека тие не мора да бидат во декември затоа што тогаш беа преусилени и мораше да се случат во декември. Може да бидат во октомври, ако тоа за некој значи успех за предвремени избори. Но, по големите политички одлуки, по сите реформи кои заедно ги донесовме, по нашето очекување за полноправно членство во НАТО, да почнеме преговори со ЕУ, време во кое економските параметри се одлични и продолжуваат да бидат одлични, треба да и дадеме шанса на државата, да истурка максимум од овој неповторлив, драгоцен период, заради тоа што економски бенефит треба да видат граѓаните, рече премиерот Заев.

Тој повтори дека мора да се даде шанса да расте економскиот стандард и тоа да не се уништи, како што рече, преку нечија желба да се оди на предвремени избори.

Лидерот на ДУИ Али Ахмети, пак, прашан какви се односите во владината коалиција рече дека партнерството меѓу ДУИ и СДСМ функционира без проблеми.

– Секако дека имаме и разлики. Секако дека има и предрасуди од некој член на нашата организација, но тоа не значи дека го загрозува партнерството и дека ќе се создаде некое незадоволство се до непочитување на партнерството. Нема никакви проблеми кои би не загрозувале нас, коалициските партнери, рече Ахмети. /МИА

Дескоска: Проблемот за Законот за ЈО не е Јанева, туку постапките на СЈО

Каменот на сопнување во текот на преговорите за Законот за јавно обвинителство не е Катица Јанева туку барањето за затворање на постапките кои се почнати од СЈО по периодот од првите 18 месеци и уништувањето на дотогаш собраните докази. 

Тоа е клучното прашање за кое има непомирливи разлики, вели министерката за правда Рената Дескоска.

Другите прашања, според Дескоска, се прашања за кои има мегдан за разговор.

– Битни се принципите кои треба да се усвојат во законот, а не личните интереси или судири. Со оглед на тоа што новиот закон предвидува дека двете обвинителства – за организиран криминал и СЈО се спојуваат, логично е дека сите обвинители чиј мандат трае и сите вработени од двете обвинителства да преминат во новото обвинителство. Катица Јанева не влегува во тој пакет, бидејќи нејзе мандатот и истекува на 15 септември. Но, кога зборуваме за конкретни личности, без оглед дали се обвинители или вработени во обвинителствата, мора да бидеме свесни дека доколку се докаже нивна кривична одговорност, тие со судска одлука би биле отстранети од своите работни места, без оглед каде законот предвидува дека би ја продолжиле нивната кариера. До донесување на судската одлука останува пресумпцијата на невиност, вели министерката за правда Рената Дескоска интервју за „Независен весник".

Последната средба меѓу работните групи на власта и опозицијата за Законот за јавно обвинителство се одржа во јули и иако се очекуваше тие да продолжат со работа од почетокот на оваа недела, тоа не се случи.

Собраниската седница за предлог-законот е закажана за 27 август, по враќањето на пратениците од колективниот одмор. За законот е потребно двотретинско мнозинство, односно поддршка од 80 пратеници.

Во меѓувреме позициите на двете страни се непроменети. Власта, како што повеќе пати потенцира е подготвена да одговори на одредени барања на опозицијата, но сепак црвената линија е бескомпромисната борба против криминалот, додека пак опозицијата е на став дека не прифаќа автоматско префрлање на јавните обвинители од СЈО во новоформираното Обвинителство за гонење организиран криминал и висока корупција, ниту тоа да биде предводено од Русковска. /МИА

Пензионерите од Кочани очекуваат поддршка од државата за изградба на регионален дом за стари лица

Локалната самоуправа на Кочани и Здружението на пензионери очекуваат поддршка од државниот буџет за изградба на регионалниот дом за стари лица, за што веќе е подготвен технички проект и обезбедена е соодветна локација.

Во Министерството за труд и социјална политика е оценето дека се работи за одличен проект, а министерката Мила Царовска вчера при посетата на Кочани најави дека финансирањето треба да се обезбеди за идната година.

– Усогласено е конечното проектно решение за изградба на старскиот дом што ќе има регионален карактер и сега се водат преговори за моделот на финансирање од страна на Владата. Каков и да биде тој, јас сум сигурна дека до наредната година ќе изнајдеме решение како да го финансираме и дека ќе почне да се гради и овој објект, исто така како што веќе го потпишавме Договорот за изградба на нова детската градинка во Кочани, истакна министерката Царовска.

На вчерашната работна средба во Општина Кочани на која присуствуваа и претставници од Здружението на пензионери, градоначалникот Николчо Илијев ги претстави досегашните активности за реализација на проектот, при што нагласи дека еден од приоритетите на локалната власт во наредниот период ќе биде токму грижата и заштитата на највозрасната категорија граѓани.

За изработка на техничката документација за Домот за стари лица во Кочани пред околу пет години беа вложени околу два милиони денари, од кои дел се обезбедија преку Центарот за развој на Источниот плански регион. Со овие средства беа направени и потребните геомеханички и асеизмички испитувања на земјиштето во поранешната воена касарна каде треба да биде лоциран објектот. Почетните пресметки тогаш покажаа дека за негова изградба и комплетирање е неопходна сума од над 80 милиони денари./МИА

Објавен јавен повик за учество на 15-та „Бела ноќ"

Објавен е јавен повик за 15. културна манифестација „Бела ноќ", што ја организираат Град Скопје и Универзална сала. Заинтересираните уметници можат да се пријавуваат до шести септември годинава.

Заинтересираните уметници апликацијата ќе можат да ја симнат од веб-страницата на http://belanok.mk , а пополнета ќе можат да ја достават на адресата на Универзална сала, булевар „Партизански одреди" бр. 45, 1.000 Скопје, со назнака „За Бела ноќ" или по електронски пат, на info@univerzalna.com.mk.

– Визуелните, применетите уметности, музиката, филмот, јавната уметност, како и урбаните изведби и перформанси се областите што ќе бидат опфатени и кои скопјани ќе можат да ги видат на „Белата ноќ" во сабота, на петти октомври, се вели во соопштението од Универзална сала-Скопје.

По завршувањето на повикот, учесниците ќе бидат оценети врз основа на квалитетот на делото, иновацијата, карактерот во опсег на предложениот концепт. Конечната селекција ќе биде извршена од страна на организаторот. /МИА

притисни ентер