Грчкиот Парламент ќе гласа за ратификација на договорите за граничните премини меѓу С. Македонија и Грција

 На пленарна седница закажана за 16 часот по локално време, грчкиот Парламент ќе гласа за ратификација на двата договори потпишани во март и април во Скопје за отворање на новите гранични премини кај Мајден и Маркова нога.

 Како и за подигнувањето на Канцеларијата за врски во Скопје на ниво на амбасада и на Канцеларијата за конзуларни, економски и трговски работи во Битола на ниво на Генерален конзулат, откако вчера Комисијата за национална безбедност и надворешни прашања ги прифати нацрт законите доставени од грчкото МНР, јави дописничката на МИА од Атина.

Согласно изнесените ставови на известувачите за нацрт законите од владејачката СИРИЗА и опозициската Нова демократија, но и на пратениците од другите партии, за време на вчерашната расправа на комисијата, предлог законите беа усвоени. СИРИЗА и Река се „за", Нова демократија и Златна зора против, додека пак Демократска алијанса на денот на гласањето ќе го соопшти ставот. Комунистичката партија на Грција, веројатно ќе биде воздржана. Пратениците од Сојуз на централисти, не присуствуваа на состанокот на Комисијата.

Расправата на Комисијата за национална безбедност и надворешни прашања, со говор ја затвори алтернативната министерка за надворешни работи на Грција, Сиа Анагностопулу, која рече дека двата договори не доаѓаат предизборно во грчкиот Парламент, туку се и по барање на локалното население и додаде дека отворањето на новите гранични премини во минатото беше попречувано, бидејќи не постеа билатерални односи меѓу двете земји.

-Мислам дека, ако навистина сакаме пријателство, соработка, зајакнување на нашата земја, она што треба да го направиме, во духот на она што се прави во Европа, би требало да ги поздравиме овие две ратификации, кои не дојдоа предизборни, дојдоа сега, а требаше да дојдат порано и имавме големи притисоци од локалното население за да дојдат што е можно побрзо, рече алтернативната министерка за надворешни работи на Грција.

Анагностопулу се осврна на граничниот премин кај Маркова нога, како долгогодишно барање на локалното население.

-Во 1959 за време на владата на Караманлис се отвори овој граничен премин, а беше затворен за време на хунтатат во 1967. Оттогаш жителите бараат отворање на овој пат што ја поврзува Грција со Северна Македонија. Не е вистина дека немаше проблем во односите и не беше потребен Договорот од Преспа. Да потсетам дека Конвенционалната рамка меѓу Грција и тогаш, поранешната југословенска Република Македонија, беше рамката Грција- Југославија, рече Анагностопулу, а како пример спомена дека не постоеше можност за регулирање ниту на избегнување на двојното оданочување.

Пратеникот од Нова демократија, Јоргос Кумуцакос, кој е известувач за нацрт законите во неговиот говор рече дека нема да ги поддржат законите и ги објасни

причините зошто тие како партија ќе гласаат против. Расправата ја поврза со претстојните евроизбори, велејќи дека владата за внатрешни цели ги носи законите на 10 дена пред изборите и додаде дека „времето е лукаво, а планот мрачен".

-Ги носите затоа што мислете дека ќе нѐ заробите, рече Кумуцакос, обраќајќи и се на владата.

Пратеникот од Нова демократија истакна дека „не беше потребен Договорот од Преспа за да се отворат нови гранични премини", бидејќи, како што рече „билатералните односи функционираа нормално и без Договорот од Преспа" и додаде дека тие сакаат добри билатерални односи со соседната земја, како што се покажало во изминатите години.

На вчерашната двочасовна расправа на Комисијата во грчкиот Парламент, збор зедоа околу 10 пратеници, кои ги претставија нивните позиции во однос на двата нацрт закони. Пратениците од СИРИЗА, Теодора Ѕакри, Костас Селцас и Јанис Сифакис кои доаѓаат од областите во кои ќе се отворат новите гранични премини ги објаснија придобивките од двата потпишани спогодби меѓу Северна Македонија и Грција.

Двата усвоени нацрт закони произлегуваат од потпишаните договори во Скопје во март и април годинава. Едниот предлог закон е под наслов „Ратификација на Договорот меѓу Република Грција и Република Северна Македонија во врска со воспоставување нов граничен премин меѓу двете земји, што ќе ги поврзува Промахи во Република Грција со Мајден во Република Северна Македонија", а вториот под наслов „Ратификација на Договорот меѓу Република Грција и Република Северна Македонија во врска со воспоставување нов граничен премин во регионот на Преспанското езеро и други одредби".

Согласно потпишаните договори, за изградбата и отворањето на граничниот премин кај Мајден ќе се користат фондови од Европската унија, а во договорот за граничниот премин кај Преспа, вклучени се и членови за подигање на нивото на Канцеларијата за врски во Скопје во амбасада и на Канцеларијата за конзуларни, економски и трговски работи во Битола на ниво на Генерален конзулат.

Според двата потпишани договори во Скопје, предвидено е да се формира заедничка Комисија на експерти од двете земји со најмногу девет претставници од секоја страна кои ќе бидат надлежни за техничките и правните теми, за функционирањето на граничните премини и за други прашања од заеднички интерес поврзани со спроведувањето на договорите.

Во рок од 30 дена од стапувањето на сила на договорот, двете страни по дипломатски пат ќе ги разменат листите со членовите на Комисијата, која за прв пат ќе се состане во рок од три месеци по стапувањето на сила на договорот, а ќе одржува состаноци на секои две години.

Ваква комисија е предвидена и за граничниот премин кај Мајден и за граничниот премин кај Маркова нога./МИА.

Амбасада на САД: Секој за кој се тврди дека ја злоупотребил довербата,мора да е одговорен

Секој за кој се тврди дека ја злоупотребил довербата на јавноста мора да биде одговорен, е ставот на Американската Амбасада,  по апсењето на Катица Јанева.

Американската амбасада ја поддржува одлуката на Обвинителството да ги испита сите наводи за корупција и да ги гони како оправдани, засновани врз законот и веродостојни факти.

„Секој за кој се тврди дека ја злоупотребил довербата на јавноста мора да биде одговорен“, е ставот на Амбасадата по апсењето на Катица Јанева. За градење трајни институции ,решавачки е да се донесе Законот за јавно обвинителство, сметаат од американската амбасада. Ова ќе осигура дека Специјалното јавно обвинителство може да продолжи со својата важна работа и да продолжи да ги следи своите случаи без прекини, што пак ќе и помогне на Северна Македонија како што напредува во интеграција кон НАТО и Европа“, соопштуваат од Амбасадата на САД.

Штетите од невремето во прилепско Канатларци и Тополчани проценети на 80 милиони денари

Штетата од невремето што на 24 јуни ги зафати селото Канатларци и околните населени места кога беа зафатени 642 хектари со земјоделски култури е проценета на 74 милиони денари.

Невремето од 4 јули во Топочанско направило штети од шест милиона денари, стои во извештаите од  комисија за процена на штети. Извештајите ги усвоија прилепските советници на денешната 30 седница на општинскиот Совет.

Според претседателот на Советот, Миле Талески, извештајот ќе биде испратен до Второостепената владина комисија.

-Со невремето кое на 24 јуни ги зафати Канатларци и околните населени места, се зафатени 642 хектара земјиште со проценета штета од 74 милиони денари. Советот го усвои и извештајот за второто невреме кое на 4 јули го погоди подрачјето на Тополчани и другите населени места, кое зафати површина од 76 хектари, а висината на проценетата штета изнесува околу шест милиони денари. Овој извештај Советот ќе го испрати до Второстепената владина комисија која на следната седница треба да го усвои извештајот и да изврши обештетување на жителите, изјави Талевски.

Универзитетот во Глазгов ќе плаќа обештетување зашто заработувало од трговија со робови

Универзитетот во Глазгов решил да исплати 20 милиони фунти обештетување , откако било откриено дека во минатото заработувал десетици милиони фунти од трговијата со робови.

Станува збор за прва британска институција што се реши на ваков потег. Парите треба да бидат собрани и исплатени наредните 20 години во рамки на Центарот за развојно истражување Глазгов- Кариби , за што овој универзитет ќе соработува со универзитетот Вест Индис.

Професорот Сер Хилари Беклс од Универзитетот  Вест Индис ја нарече одлуката на Универзитетот во Глазгов „храбар, морален и историски чекор“ во справувањето со минатото.

До одлуката дојде откако беше откриено дека голем број донации собрани од Универзитетот во Глазгов во 18-ти и 19-ти век, доаѓаат од луѓе вклучени во трговијата со робови.

Универзитетското раководство појасни дека и покрај тоа што никогаш не поседувале робови или тргувале со добра создадени со робови, универзитетот имал значителна финансиска поддршка од трговијата со робови.

Вкупната сума  собрана од Универзитетот преку трговијата со робови се проценува меѓу 16,7 милиони и 198 милиони фунти, а донациите собрани за изградба на кампусот во Гилморхил меѓу 1866 и 1880 година вклучиле 23 лица кои биле вклучени во трговијата со робови на американскиот континент, најмногу на Карибите.

притисни ентер