Република Македонија се преименува во Република Северна Македонија

Со 81 глас за Собранието на Република Македонија синоќа ги изгласа уставните измени  односно се донесоа  амандманите XXXIII, XXXIV, XXXV и XXXVI на Уставот на Република Македонија, а потоа и се прогласија. 

Усвоен и прогласен е и Уставниот закон за спроведување на амандманите.Македонија согласно договореното ќе се преименува во Република Северна Македонија, а државјанството останува македонско/државјанин на Република Северна Македонија, но тука е прифатен амандман на Уставниот закон, на Беса, со кој се појаснува како ќе гласи за граѓаните Албанци на албански јазик и ќе се утврди во сите закони каде што е тоа потребно.

Со амандманот XXXIII во Уставот зборовите „Република Македонија" се заменуваат со зборовите „Република Северна Македонија", а зборот „Македонија" се заменува со зборовите „Северна Македонија", освен во член 36 од Уставот на Република Македонија.

Амандманот XXXIV предвидува во Преамбулата на Уставот на Република Македонија да се бришат зборовите „кои живеат во нејзините граници", „одлуките на АСНОМ" се заменуваат со зборовите „правните одлуки кои се наведени во Прогласот од Првото заседание на АСНОМ до македонскиот народ за одржаното заседание на АСНОМ", по зборот „година" се додаваат зборовите „на кои се изрази волјата за создавање на самостојна суверена држава и Охридскиот рамковен договор", а се бришат зборовите „одлучија да". Тука е прифатено барањето на Алијансата на Албанците – Преамбулата на Уставот ќе гласи „граѓаните на Република Македонија, македонскиот народ и дел од албанскиот народ, турскиот народ, влашкиот народ, српскиот народ, ромскиот народ, бошњачкиот народ и другите".

Амандманот XXXV гласи „Републиката го почитува суверенитетот, територијалниот интегритет и политичката независност на соседните држави". Со овој амандман се дополнува членот 3 од Уставот на Република Македонија.

Амандманот XXXVI посочува дека „Републиката ги штити, гарантира и негува особеностите, историското и културното наследство на македонскиот народ.

Републиката ги штити правата и интересите на своите државјани кои живеат или престојуваат во странство. Републиката се грижи за дијаспората  на македонскиот народ и за дел од албанскиот народ, турскиот народ, влашкиот народ, српскиот народ, ромскиот народ, бошњачкиот народ и другите и ги негува и унапредува врските со тактовината.

Републиката притоа нема да се меша во суверените права на други држави и во нивните внатрешни работи. Со овој амандман се заменува членот 49 и амандман 2 од Уставот на Република Македонија.

Ќе се уредува нова плажа на Дојранското Езеро во Сретеново

 Во пресрет на летната туристичка сезона која на Дојранското Езеро најголем интензитет достигнува кон крајот на јули и почетокот на август, ќе се уредува нова плажа на езерското крајбрежје во Сретеново, Стар Дојран.

Од Општина Дојран потврдија дека плажата ќе биде долга 200 метри и ќе биде посипана со слој автохтон песок од 30 сантиметри. Покрај ова, плажата ќе добие заштита од потпорен ѕид од армиран бетон со дебелина од 30 сантиметри.

По изградбата, плажата во Сретеново ќе биде целосно партерно и хортикултурно уредена за да ги пречека туристите.

Слична плажа минатата година беше изградена во близина на границата со Грција, во атарот на селото Николич. Моментно долж Дојранското крајбрежје до граничниот премин Дојран, во употреба, заедно со приватните, има десеттина плажи уредени за потребите на гостите кои од година во година доаѓаат во се поголем број. 

Никола Димитров за „Ле Монд":Македонија сe движи „дефинитивно и неповратно кон иднината"

 Министерот за надворешни работи Никола Димитров, во трибина објавена во париски „Ле Монд" објаснува зошто нашата земја се согласи да го промени своето име.

Сега, тој ја повикува ЕУ да преговара за пристапувањето на оваа „мала мирна држава на Балканот", јави дописникот на МИА.

– Решивме да не бидеме робови на историјата. Во согласност со Грција, мојата држава се согласи да додаде географско појаснување на своето име и да се нарекува „Република Севеана Македонија", пишува Димитров.

Да бидеме совршено јасни, додава, ние никогаш не сме помислиле дека Република Македонија, мала, мирна балканска држава, која мирно и достојно излезе од пеколот на војната во поранешна Југославија, може да претставува закана за некој или дека нејзинито име подразбира територијални или други барања против нашите грчки пријатели.

– Меѓутоа, реалноста ни покажува дека Грција поинаку го толкува нашето име. Поминавме четврт-вековни дебати, обидувајќи се да ја убедиме другата страна, да се расправаме за терминот „Македонија”. Во меѓувреме, возовите минуваат. Од добар ученик на Балканот, Македонија остана на маргините на интегративните процеси, објаснува шефот на македонската дипломатија.

Според него, единствениот излез од овој маѓепсан круг, вели, е дефинитивно и неповратно да се свртиме кон иднината.

– Единствената битка што треба да се води е за сегашните и идните генерации. Нивното право да живеат во својата земја, со еднакви можности со оние на другите Европејци, без да мора да одат да бараат среќа на друго место. Ова е единствената мисла што ја имавме на ум кога решивме да влеземе во преговори со Грција за да го решиме нашиот спор, категоричен е Димитров.

Тој признава дека не било лесно, ниту за нас, ниту за нашите грчки пријатели. Опасноста на која се изложиле политички лидери, според Димитров, не е ништо, како што вели, во споредба со бездната на очајот во кој се наоѓа целата нација.

На прашањето дали имавме друг избор, тој одговара дека секогаш постои друг избор.

– Можеме да пропуштиме еден или повеќе изборни циклуси и да го пропуштиме возот, па дури и последниот воз, за ​​Европа и продолжиме да се жалиме и да ги обвинуваме нашите соседи за нашата лоша судбина, да ја обвиниме Европа за недостатокот на принципи, да обвинуваме за незаинтересираноста на светот. Ние би можеле без ризик да останеме на врвот на дрвото и да се храниме горки плодови од страв и недоверба, би можеле да бидеме задоволни со традиционалниот квази-патриотизам, вели Димитров.

Понатаму тој истакнува дека ние сме решени да бидеме патриоти на современ, европски и визионерски начин.

– Да ја задржиме нашата душа, толку тесно поврзана со нашето право да се дефинираме себеси како Македонци, право потврдено со овој договор. Нашата душа е дефинирана и од нашиот јазик, македонскиот, јужнословенски јазик. Да не ги жртвуваме овие работи на олтарот на историјата, вели министерот за надворешни работи на Република Северна Македонија.

Според Димитров, договорот со Грција иако бара многу, сепак со него  можеме да живееме со достоинство.

– Со овој договор, ги чуваме и ги потврдуваме вредностите кои се свети за секоја нација: нашиот идентитет и се што е поврзано со тоа. Во исто време, правиме разлика меѓу нашата перцепција и грчката перцепција за Македонија, во надеж дека и двете ќе продолжат да живеат во препознавање, разбирање и хармонија, појаснува тој.

Последно, но не и најмалку важно, според Димитров, е тоа што со него го отвораме патот за целосна интеграција на земјата во Европската унија (ЕУ) и во НАТО.

– Еве конечно, добри вести кои доаѓаат од Балканот. Во време кога бранот на популизам и евроскептицизам станува сè пошироко распространет низ целиот свет, оваа надеж не смее да се изгуби во поплавите на лошите вести што го погодуваат целиот свет, предупредува Димитров.

Тој притоа својата трибина во париски „Монд" ја завршува со заклучокот дека ЕУ е таа која сега е на потег да ја покаже истата храброст.

– Сега чекаме Европа да признае дека некој на Балканот покажува лидерство и храброст, со нетрпение и желба да учествува со другите земји-членки во градењето на Европа. Сега е на Европа да ја покажеме истата храброст. Таа мора да ни подаде рака и да и даде шанса на мојата земја со носење на одлука за отворање на преговорите. Ништо повеќе, ништо помалку. Ние тоа го заслуживме, истакнува министерот Никола Димитров. /МИА.

Општина Аеродром: Ќе биде преиспитан договорот со приватната маркетинг агенција

Иницијалната потреба за зајакнување на капацитетите за информирање и едукација на граѓаните ќе биде преиспитана исклучиво врз точно одредување на јавниот интерес и критериумите за одговорни јавни комуникации.

Општина Аеродром ја известува јавноста дека врз основа на јавниот интерес, како и принципите според кои се води за одговорно и транспарентно работење, кое подразбира рационалност и економичност, сукцесивниот Договор со приватната маркетинг-агенција ќе биде преиспитан.

Иницијалната потреба за зајакнување на капацитетите за информирање и едукација на граѓаните ќе биде преиспитана исклучиво врз точно одредување на јавниот интерес и критериумите за одговорни јавни комуникации.

Тоа значи одговорно трошење на парите на граѓаните, економичност и рационалност, интегритет во јавните комуникации преку отворено, транспарентно, објективно и релевантно комуницирање со граѓаните.

Граѓаните ќе бидат известени за одлуката и за натамошното постапување.

Општина Аеродром

притисни ентер