Република Илинденска Македонија не е на маса.
Атина преговара за четирите стари предлози на медијаторот Нимиц, појасни грчкиот премиер во собранието, одговарајќи на прашање на лидерот на грчката опозиција, Мицотакис за тоа - дали Илинденска Македонија се уште е тема на преговорите.
Ципрас порача дека приоритет на владата е да обезбеди ерга омнес и уставна ревизија, прашања за кои како што оцени, бил постигнат важен напредок.
-Господинот Заев е првиот премиер од соседната земја што јавно ја прифати оваа перспектива за сложено име, ерга омнес со уставна ревизија. Ова го немате до сега видено во период кога вашата партија се наоѓаше во влади што преговараа. Ние јасно изјавивме дека преговараме врз основа на четирите имиња предложени од Обединетите Нации, конкретно пакетот предлози од Нимиц, изјави Алексис Ципрас, премиер на Грција.
Битката за Илинденска Македонија, според македонската влада, утре и задутре сепак ќе се бие во Њујорк. Во пресрет на новата рунда преговори, македонската влада се уште верува дека овој предлог може да донесе конечен и позитивен епилог.
-Сметаме дека дадениот предлог од наша страна по лидерската средба ги одразува севкупно сите аспекти што се потребни за да се заштити идентитетот, и на македонскиот народ, меѓутоа ги одразува и сите останати делови кои ја обележуваат Македонија како мултиетничка држава. Сметаме дека тоа е добар предлог за конечно решение, рече Бошњаковски.
Со став се огласи и шефот на грчката дипломатија, Коѕијас кој е во посета на САД. Тој посочи дека утре на маса во Њујорк, Грција ќе изложи голем текст, кој е комбинација од ставовите на Атина и на медијаторот Нимиц. По средбата со американскиот советник за национална безбедност, Џон Болтон, Коѕијас рече дека кај Вашингтон постои голем интерес за решението на спорот, но оти не и врши притисок на Грција.