Надал: Се откажувам од борбата за првото место

Еден од најдобрите тенисери во светот Рафаел Надал најави дека повеќе нема да се бори за првото место на АТП листата, откако викендов Рожер Федерер со успехот во Ротердам со полни 36 години како највозрасен тенисер во историјата, се искачи на лидерската позиција.
Надал истакна дека Федерер е врвен играч без разлика дали е прв или не. 

- Тој немаше потреба да се врати на првото место за да докаже кој е во тенисот. Она што тој го постигна е навистина многу тешко и јас само можам да му честитам. Рангирањето не лаже, тој беше подобар од мене во последните 12 месеци, посочи Надал.

Шпанскиот тенисер наведе дека ќе се труди да ја одигра сезоната најдобро што може, без при тоа да се оптоварува со позицијата на АТП листата.

- Ме прави среќен тоа што се чувствувам мотивиран и имам желба да освојувам турнири. Нема да се борам за првото место. Да се биде прв, трет или петти веќе нема разлика, наведува Надал.

Тој во моментов се подготвува за турнирот во Акапулко, Мексико, на кој ја брани титулата откако лани во финалето го порази Американецот Сем Квери./МИА

СП 2018: Белгија убедливо ја совлада Панама

Белгија убедливо ја совлада Панама со 3:0 во првиот натпревар од групата Г на Светското првенство во Русија.

Белгиската репрезентација доминираше на теренот во текот на целиот натпревар и без поголеми проблеми дојде до победа.

Првиот гол во 47 минута го постигна Дрис Мертенс, а потоа Ромелу Лукаку прво во 68 минута зголеми на 2:0, а седум минути подоцна беше прецизен за конечни 3:0.

Во вториот натпревар од оваа група во Волгоград ќе се соочат Англија и Тунис. /МИА

СП 2018: Јеро: Имаме целосна доверба во Де Геа

Селекторот на шпанската репрезентација Фернандо Јеро изјави дека голманот Давид де Геа е смирен и сталожен по натпреварот со Португалија, во кој направи неколку грешки и прими три гола од португалскиот фудбалер Кристијано Роналдо.

Соседското дерби меѓу Шпанија и Португалија заврши со реми 3:3.

- Забележав дека Давид е смирен и сталожен. Во него сите имаме целосна доверба. Тимот имаше еден слободен ден и морам да кажам дека играчите се поопуштени, истакна Јеро.

Шпанија следниот натпревар го игра на 20 јуни против Иран. /МИА

СП 2018: Шведска со пенал ја совлада Јужна Кореја

Шведска со гол од пенал на натпреварот против Јужна Кореја стигна до минимална победа од 1:0 во групата Ф на Светското првенство во Русија.

Натпреварот во Нижи Новогород изобилуваше со прекршоци. Јужна Кореја покажа подобра игра во почетокот, контролирајќи го поседот на топката. Меѓутоа, најсериозната шанса во првиот дел ја имаше Шведска преку Маркус Берг, но голманот на Јужна Кореја Чо Хјун-Ву имаше уште одлична интервенција.

Швеѓаните во второто полувреме доминираа на терен. Во 61-та минута Ким Мин-Ву го фаулираше Виктор Клаесон, а судијата Агиљар по прегледување на снимката од ВАР системот досуди пенал за Шведска.

Капитенот Андреас Гранквист го реализираше пеналот за водство на Шведска од 1:0.

Во оваа група Шведска и Мексико водат со по три бода, а Германија и Јужна Кореја се без бодови. /МИА

притисни ентер