Поделеност во СДСМ - Рахич, Георгиев и Велјановски бараат Заев да си оди

По 8-часовна дебата и излагање на 42 делегати заврши конгресот на СДСМ, по што се пристапи кон гласање на доверба на раководството. Гласањето е тајно, а во салата се присутни околу 600-тини делегати. Сите тие треба да се изјаснат дали се за или против Заев и натаму да остане на чело на партијата.
Конгресот се одвиваше во жесток амбиент, во бурна дебата меѓу две спротивставени струи. Едните застанаа во одбрана на Заев и му дадоа поддршка да остане претседател на СДСМ, а другите бараа негова оставка. Аргументите на противниците на Заев се дека тој нема капацитет да ја води партијата и треба да си замине од лидерската позиција.

Делегатите единствено беа сложни во однос на извештајот за претседателските и парламентарните избори кој едногласно беше усвоен на конгресот. Дали Заев и натаму ќе остане на чело на партијата, ќе биде познато кога ќе заврши пребројувањето на гласовите.  

Потпишани четири нови јапонски грантови за едукација, здравство и јавни услуги

Четири нови јапонски грант проекти за подобрување на условите од областа на едукација, здравство и јавните услуги во земјава беа потпишани вечерва од јапонската амбасадорка Кеико Ханеда и македонските претставници.

Вкупно се одобрени десет проекти од Јапонија од кои шест се потпишани лани и веќе се имплементираат, а целта е да се подобрат основните човекови потреби во нашата земја.

Новопотпишаните проекти се наменети за подобрување на условите во градинката „Мајски Цвет" во Битола преку реконструкција на покривот во објектот градинка „Коца Василева" во вредност од 60 илјади евра, подобрување на училишната средина во основните училишта „Кирил и Методиј" во Прилеп во вредност од 57 илјади евра, во училиштето „Алија Авдовиќ" во село Батинци во Општина Студеничани во вредност од 57 илјади евра и во училиштето „Светозар Марковиќ" во Старо Нагоричане во вредност од 52 илјади евра.

Амбасодорката на Јапонија, Кеико Ханеда на денешното потпишување на овие проекти истакна дека со ова уште еднаш се потврдува силното пријателство и посветеноста на Јапонија во поддршката на социоекономските напори за реформи и за европска интеграција на нашата држава.

– Годинава успеавме да направиме десет нови грант проекти со нашите партнери од различни региони. Од 1996 година изведовме 148 проекти благодарение на владата, локална самоуправа и јавните установи на Северна Македонија, јапонскиот народ е среќен како пријател на вашата земја дека ќе имате придобивки од сите овие проекти. Јапонија ќе продолжи да ги поддржува вашите реформи и напори, а јас ќе направам се што е во моја моќ да го зајакнам нашето пријателство, рече амбасадорката.

Според министерот за здравство, Венко Филипче кој присуствуваше на церемонијата, со години наназад, близу 15 години здравствениот сектор добива многу значајна поддршка од Амбасадата и народот на Јапонија.

-Една добра карактеристика на целата оваа помош која со години наназад стигнува од Амбасадата на Јапонија е тоа што е многу добро селектирана и многу добро служи на намената. Служи на една група експерти, служи на пациенти, служи на широко население кое покрива здравствени услуги во град, регион или помало место, и една карактеристика што циркулира и ние здравствените работници многу често ја спомнуваме е дека се што е донирано од јапонската амбасада се уште функционира, додаде Филипче.

Јапонија, како што потенцира вечерва и министерот за образование и наука, Арбер Адеми, е земја која останува една од најголемите надворешни пријатели на нашата земја, и која континуирано ја поддржува државата во заложбите за нејзин развој и просперитет, преку подобрување на условите и состојбите во многу општествени сфери и сегменти.

-Денешниот настан е потврда за тоа, денеска Јапонија повторно преку свое дипломатско претставништво а во рамки на долгогодишна грант, програма за финансирање на мали проекти за човековата безбедност им помага на училиштата, здравствените институции, локални самоуправи да обезбедат подобри услови и можности за крајните корисници на нивните услуги, рече Адеми подвлекувајќи дека преку оваа програма се дава посебно внимание на македонското образование и на подобрувањето на условите на училиштата.

Во суштина, посочи Адеми, унапредувањето на образовната инфраструктура и на квалитетот на наставата во основните и средните училишта е врвен приоритет на Министерството за образование и наука.

Останатите шест проекти кои се потпишаа во ноември и декември се проектите за подобрување на основните јавни услуги на општина Градско, подобрување на медицинската средина на ЈЗУ Здравствен дом Кратово, обезбедување на комунално возило на Општина Маврово Ростуше, комунално возило на Општина Пробиштип и подобрување на медицинското опкружување на Институтот за патофизиологија и нуклеарна медицина во Скопје./МИА

Џафери: Слободата на изразување на мајчин јазик игра суштинска улога во заштитата на сите други права

Слободата на изразување на мајчин јазик како фундаментално човеково право игра суштинска улога во реализацијата и заштитата на сите други права. 

Со Законот за употреба на јазиците што беше донесен на 14 март 2018 година, можеме да кажеме дека е создадена солидна основа во насока на јазичната рамноправност и ставен е уште еден камен на зацврстување на младата демократија што ја развиваме во нашата држава, посочи денеска претседателот на Собранието Талат Џафери, на отворањето на тридневната меѓународна научна конференција „Многујазичноста и предизвиците на примената на Законот за употреба на јазиците во РСМ" во организација на Агенцијата за примена на јазикот.

Џафери истакна дека подигнувањето на јавната свест за значењето на употребата на мајчиниот јазик не е тренд, туку потреба на реалното секојдневие во целиот свет, додавајќи оти промовирањето на мајчиниот јазик е од суштинско значење за одржливите општества, какво што е и нашето мултиетничко општество.

– Важно е да се симнат предрасудите, сите фактори кои работат во насока на претставување на предностите на едно мултиетничко општество, што значи и мултилингвално меѓудругото, да се научиме да се слушаме меѓусебе, да научиме да имаме почит едни кон други и кон сета таа целина што го прави еден поединец посебен, неговата етничка припадност, јазикот што го говори, религијата на која припаѓа, социјалниот слој од каде што доаѓа, економската состојба, полот, професијата и серија други карактеристики, порача Џафери.

Тој додаде дека Собранието е прва институција која го отворила патот кон реализацијата на ова фундаментално право, во која почнало да се прави превод на материјалите што се доставуваат во институцијата и каде за првпат се вршело и консекутивно и симултано толкување на говорниците на седниците на работните тела и на пленарните седници.

– Морам да кажам дека почетоците беа тешки, имајќи го предвид целиот политички контекст, малиот број на кадри во сооднос со огромниот обем на работа и скромното опремување со речници. Сепак, со ангажман на сите страни вклучени во процесот на имплементација на ова право, денес, можам да кажам дека сме поставиле солидна основа, со кадри кои сега веќе имаат повеќегодишно искуство, дополни Џафери.

Вицепремиерот и министер за политички систем и односи меѓу заедниците Садула Дураки најави дека во иднина ќе се фокусираат на две области – едната е ефикасно спроведување на Законот за употреба на јазиците, втората да се најде подобро решение за создавање капацитети, а особено, како што рече тој, имаме потреба од преведувачи.

– За да се има успешен и координиран процес ние како Министерство ќе предложиме акциски тригодишен план кој ќе содржи детално мерки кои треба да се преземаат за подобро спроведување на Законот за употреба на јазиците, да ги третираме разните аспекти на јазиците во нашата земја. Кога сме кај Програмата за покренување на свеста за спроведување на Законот за јазици што се подготвува во Владата, мислам дека е добра идеа, бидејќи не само што ја покренува свеста за спроведување на законските правила, туку истовремено отвора јавна дебата за важна тема, рече Дураки.

Агенцијата за примена на јазикот на крајот од првиот ден од конференцијата потпиша два Меморандума за соработка со Унивезитетот на Југоисточна Европа и со Универзитетот „Мајка Тереза". 

Основците од Карпош ќе отворат новинарски клуб и ќе изработуваат училишни веб страници

Во рамки на денешната 36. седница, советниците од општина Карпош ги изгласаа сите предлог – Одлуки со кои се одобруваат финансиски средства за проекти од областа на образованието, локалниот економски развој и  рамноправниот пристап на жените.

Како што соопштуваат од општина Карпош, здружението „Профицио“ ќе го реализира проектот „Основи на веб програмирање и изработка на веб сајт“, во кој ќе биде инволвирана одредена група на осмоодделенци од сите училишта во Карпош. Покрај тоа што ќе се стекнат со основите на HTML, CSS и веб програмирањето, основците со помош на професионалци ќе изработат информативен веб сајт за училиштето од кое доаѓаат, којшто потоа ќе остане во негово владение.

Советниците гласаа позитивно за проектот на Центарот за поддршка и креативен развој, со кој десетина ученици од осмо и девето одделение ќе се запознаат со новинарските техники преку четиримесечна обука, која опфаќа формирање на новинарски клуб од основните училишта од општина Карпош. Притоа, основците ќе учествуваат во  подготовка на весник, печатење и негова промоција. Во проектот ќе бидат вклучени и наставници по македонски јазик и општествени науки.

Локалната самоуправа обезбеди средства за  проектот „Второ семејство“, кој ќе го реализира Здружението за заштита на правата на децата - „Поврзани“. Се работи за специфичен пристап кон основците, во рамки на училишната паралелка - како второ семејство, која на еден начин треба да претставува безбеден микросистем на интеракции во воспитно – образовниот процес. Во таа насока ќе се организираат повеќе училишни работилници, каде ќе се воспостават воспитни вредности за градење на меѓуврсничка соработка и поддршка на ранливата категорија на ученици (пр.во случај на попреченост, развод и сл.), преку вклучување на инклузивни содржини.

Здружението за едукативно – креативна детска работилница „Играј и учи“, ќе го спроведе проектот за подигнување на свеста за животната средина преку уметност, театар и раскажување на приказни – „Еко театар“. Со него ќе бидат опфатени 180 деца од шесто до девето одделение, во девет основни училишта од општина Карпош. Основците ќе се запознаат детално со екологијата, глобалното затоплување, рециклирањето и одржувањето на здравата околина.

Советниците дадоа „зелено светло“ и за проектот на невладината DFCCA (Drive for colon cancer awarnes), која ќе организира еднодневен настан за собирање на средства, кои потоа ќе бидат наменети за кампања за борба против ракот на дебелото црево и малигнитетот кај децата.

Од областа на локалниот економски развој, советниците од Карпош дадоа поддршка и за проектот на „Центарот за поддршка и креативен развој“, кој подразбира стручна обука на 12 жени – жителки на Карпош, за започнување на сопствен бизнис. Станува збор за жени од ранливи категории кои се наоѓаат во потешка социо – материјална состојба, кои со помош на искусни обучувачи и експерти, треба да ги осознаат правните и економските принципи на водењето бизнис.

Со одлука на Советот, едукативниот центар „Идеа“ ќе добие финансиски средства за реализација на проектот „И жените можат“, чија стратешка цел е да се зголеми нивото на вработеност  на жените од сите делови на општина Карпош. Во рамки на проектот ќе се спроведе и истражување на цела територија на локалната самоуправа, кое ќе се движи во насока кон добивање на конкретни анализи за потребите на три целни групи на жени.

На седницата беше усвоен и Годишниот Извештај за работа на полициската станица „Карпош“ за 2019 година, се наведува во соопштението од општина Карпош.

притисни ентер