Според указот на унгарскиот претседател, орденот на македонскиот амбасадор му се доделува за неговиот исклучителен придонес кон развојот на македонско-унгарските односи за време не четиригодишниот мандат.

Орденот му беше предаден од државниот министер за надворешни работи Немет Жолт на церемонија за време на прошталниот прием за крајот на амбасадорскиот мандат на Ангелов што го организираше Македонската амбасада во Будимпешта.

Дипломатскиот прием се одржа во престижниот Унгарски музеј за современа уметност, Музејот Лудвиг во Будимпешта со присуство на дипломатскиот кор во Унгарија и високи претставници на унгарските власти.

По приемот на орденот амбасадорот Ангелов истакна дека овој чин е уште една потврда за одличните односи на пријателство меѓу Македонија и Унгарија кои во изминатиот период особено се продлабочија во повеќе општествени области.

- Во меѓународната политика двете држави споделуваат исти вредности во кои почитувањето на меѓународното право треба да биде централно во меѓудржавните и мултилатерални односи, што се гледа и во силната, високо принципиелна поддршка на Унгарија за безусловна и неодложна евро-атланска интеграција на Македонија, истакна амбасадорот Ангелов во обраќањето пред дипломатските и владини претставници во Унгарија.

За време на приемот се одржа и дегустација на вината од винаријата Стоби. Во организација на Македонската амбасада, во наредните денови ќе се одржи дополнителна презентација на вината на Стоби за најголемите унгарски вински дистрибутери. /Извор: МИА/