Амбасадорот на нашата држава и презентер на непроценливото македонско фолклорно богатство се претстави со народните ора „Тешкото“, „Малешевка“, „Драчевка“, „Лазаренка“, „Шопска“, познатите македонски вокални сплетови, како и со рачно изработените народни носии кои ги отсликуваат македонската традиција и македонските обичаи.

- Настапот на „Танец“ во рамки на Европската престолнина на културата е особено значајно важна мисија чија цел е славење на заедничкото културно наследство. Затоа особено сум горд што публиката заедно со ансамблот уживаше во добро познатиот македонски ритам, доживувајќи ја нашата традиција како нешто ново, што ги чини задоволни и љубопитни да дознаат повеќе за македонската култура, изјави директорот на Ансамблот за народни игри и песни „Танец“ Зоран Џорлев по настапот.

На фестивалот, кој директно беше пренесуван на Летонската национална телевизија, покрај „Танец“ настапија и музичари, танцови групи и уметници од Индија, Германија, Естонија, Романија, Грузија и Колумбија.

Со поддршка на Министерството за култура во Рига во јули во рамки на Светската хорска олимпијада „Рига 2014“ ќе настапи и женскиот камерен хор „Св. Злата Мегленска“.

- Учеството на Република Македонија на оваа значајна културна манифестација ќе придонесе за афирмација на македонската култура и на културните вредности, како и за продлабочување на соработката во областа на културата и уметноста со Летонија, што е во функција на приближување на народите и државите и нивно запознавање со меѓусебната култура и традиција, информира Министерството за култура.

Република Македонија почна со презентација на своето богато културно наследство и современо творештво уште во 2010 година, од кога македонската култура и традиција беше претставена во Истанбул, Талин, Марибор и во Марсеј-минатогодишната престолнина на културата. /МИА