По бројните жалби од страна на граѓаните дека им пристигнале повисоки сметки за струја во месеците април и мај, на ЕВН и се заканува прекршочна, но и постапка за одземање на лиценцата, доколку не ги корегира фактурите кои им биле доставени на граѓаните, соопштија од Регулаторна комисија за енергетика.
Претседателот Марко Бислимовски ги повика сите оние кои сметаат дека платиле повеќе отколку што потрошиле да ги достават податоците од своите броила до ЕВН, преку вајбер, електронска пошта или пак на нивната апликација..
-ЕВН е должен по добивање на податоците од потрошувачите да ги коригира нивните фактури за електрична енергија и притоа погрешно издадената фактура со повисока потрошувачка енергија да ја поништи и да изготви нова, согласно реалната потрошувачка на енергијата. Доколку ЕВН не изврши коригирање на фактурите согласно самочитањето на корисниците, тие можат да побараат помош од РКЕ и ние ќе посредуваме при изготвување на новата сметка, изјави Марко Бислимовски РКЕ.
Тој додаде дека, оние кои не можат да ги прочитаат вредностите поради проблеми со неисчистено стакло и слично, на ПП образец да платат сметка за електрична енергија во износ колку што сметаат дека реално потрошиле, а ЕВН, не смее да ги исклучи.
По бројните реакции, од компанијата смируваа, велејќи дека нема да има оштетени корисници, и дека нема да биде наплатено повеќе од потрошеното, додавајќи дека ако се наплатени повеќе киловат часови, следната сметка ќе биде пониска.