Апелациониот суд од Скопје ја укинал ослободителната пресуда за браќата Ордан и Љупчо Георгиевски и Ѓоре Петровски и случајот го враќа во првостепена постапка.
Одлуката на Апелација се уште не е стасана во велешкиот суд, изјави за Канал 5 претседателот на судот Јордан Лазаров, каде го очекуваат предметот. Судските процеси за овој случај траат пет години. Но и натаму не се откриени убијците на старецот од Ореше. Беа донесени три пресуди. Со првите две браќата Георгиевски беа осудени на 12 години затвор за убиство на Милошевски, а Ѓоре Петровски гастарбајтер од Америка беше осуден дека го нарачал убиството.

Последната пресуда донесена во март годинава, ги ослободи од вина обвинетите. Обвинителството ја обжали пресудата и денеска Апелација повторно го врати предметот во судот во Велес. Судскиот процес го водеа судии и обвинителот кои сега се во затвор. Сите тие беа уапсени во случајот Ликвидација, за злоупотреба на службената положба, поткуп и фалсификување на документи.

И новинарот Кежаровски доби 4 и пол години затвор за издавање на идентитетот на заштитениот сведок во Ореше. Тој вчера го напушти истражниот затвор во Шутка и до правосилноста на пресудата ќе биде во домашен притвор. За Здружението на новинарите ваквата одлука на судот претставува чекор кон подобрување на судската пракса и очекува дека ќе му дозволи на Кежаровски да се брани од слобода.

- Веруваме дека Кежаровски е невин и очекуваме Апелацискиот суд во Скопје да ја укине првостепената одлука и да го прогласи за невин. Кежаровски со објавените текстови не се огрешил пред законот, туку открил злоупотреба на институтот заштитен сведок, стои во рекацијата од ЗНМ

Пресудата за случајот Ликвидација беше донесена на 21 Октомври, но се уште не е јавно објавена.