Вселенското летало именувано по кралот на Итака успешно слета на Месечината 23 минути по полноќ, но се уште се чекаат деталите за потфатот кој ќе остане во историјата од најмалку две причини - ова беше прв пат приватна сонда да слета на лунарната површина, а нејзиниот триумф го претставува враќањето на САД по 52 години.
Со овој успех Америка го спаси образот кога се во прашање лунарните експедиции, во кои во 21 век досега Кина, Индија и Јапонија ја претекнаа, но и се врати посилна во новата вселенска трка. Дополнително, слетувањето на сонда на Месечината е само првиот чекор кон нови човечки експедиции, планирани за 2026 година.
- Прв ден на површината на Месечината, најнови информации. Одисеј е жив и здрав. Контролорите на летот комуницираат со него и му наредуваат на леталото да преземе научни податоци. Сондата има добра телеметрија и соларно полнење. Продолжуваме да дознаваме повеќе за конкретни информации како географска широчина и надморска височина, општата состојба и ориентација - е наведено во твитот Intuitive Machine, каде беше најавена и прес-конференција со агенцијата НАСА.
Ова е прва информација за американското летало откако е потврдено слетувањето, но сè уште не се објавени фотографии од Одисеј на површината на Месечината.
- Америка се врати на Месечината, за прв пат по половина век. На осмиот ден од нивното патување од четвртина милион милји, Intuitive Machines успешно направија историско слетување. Тоа е голем успех за Intuitive Machines, SpaceX и NASA. Каков триумф е ова за човештвото. „Одисеј ја стигна Месечината“, изјави Бил Нелсон, администратор на НАСА, веднаш штом беше потврдено дека леталото успешно слетало.
По дебаклот со вселенското летало „Перегрин“ пред околу еден месец и децении без обид за лунарна мисија, Америка го загуби водството во истражувањето на Месечината, а ја презеде Кина. Иако СССР (чиј наследник е Русија) и САД ја освоија површината на Месечината во 20 век, тие заостанаа зад Кина, Индија и Јапонија во 21 век.
– За прв пат од 1972 година НАСА слета вселенско летало на површината на Месечината. Но, агенцијата тоа не го направи сама, туку во партнерство со приватни компании. Благодарение на новите технологии и ова јавно-приватно партнерство, научните проекти на Месечината и идните мисии ќе отворат нов свет на научни можности. Како дел од проектите започнати оваа година, тимови од научници, вклучувајќи ме и мене, ќе можат да вршат радиоастрономски истражувања од јужниот пол и од далечната страна на Месечината. Има многу потенцијал во овие мисии - изјави за The Conversation Џек Барнс, професор по астрофизика и планетарни науки на Универзитетот во Колорадо во Болдер.