Во Македонија како и во Косово, власта е заснована на авторитаризам како последица на нецелосна демократска промена, нотираат од „Фридом хаус“.
Извештајот покажува дека во целиот регион е забележан пад на демократијата, а како што е наведено во текстот, бројот на држави оценети како демократски не бил толку мал дури од 1995 година кога првпат бил објавен ваков извештај.
Во делот за Македонија е евидентиран прогрес, но стои и дека неодамнешните случувања го доведуваат во прашање напредокот.
-„Поради пандемијата од коронавирус се одложени вонредните парламентарни избори во земјата што беа закажани за 12 април по оставката на Зоран Заев, бидејќи земјата не доби датум за почеток на пристапните преговори со Европската Унија“ е нотирано во извештајот.
Напредок е евидентиран во областа на медиумите и во тој дел се опфатени Македонија и Косово.
„Двете земји бележат напредок во областа на независните медиуми. Нашите стручњаци утврдија долгорочен тренд на пораст на објективното и веродостојно известување, како и зголемување на бројот на различни медиуми, велат од „Фридом хаус“.
Македонија е спомената во извештајот и во врска со влијанијата на Кина во регионот. „Фридом Хаус“наведува дека Кина во својот меѓународен ангажман не користи методи на директна конфронтација, туку прикриени методи на делување врз демократските институции во регионот што се протега од Централна Азија до Централна Европа.
Постои т.н. „должничка дипломатија“ во Црна Гора и во Македонија во кои Кина контролира значителна сума на странскиот долг на тие држави“, пишува истражувачот Мајкл Шмелцер во извештајот.