Култура

„Бог на масакрот“ нова премиера на штипскиот Народен театар

„Бог на масакрот“ од француската писателка Јасмина Реза, а во режија на Нела Витошевиќ е новата театарска претстава, која утре премиерно ќе се изведе во штипскиот Народен театар.

Витошевиќ на денешната прес-конференција вели дека „Бог на масакрот“ е драма со комични елементи, во која актерите бараат решение на проблемите, со кои, секојдневно се соочува современиот човек. Таа истакна дека текстот е поставува безброј пати, а ги има добиено и сите европски и светски награди.

-Претставата практично почнува од две деца кои се степале во еден парк, односно во школски двор и едното од децата завршило со повреда на двата заба и од таа причина родителите на двете деца се среќаваат на еден цивилизиран начин, да разговараат околу конфликтот на децата. Авторката она што го отвара како еден од најбитен аспект во претставата, а тоа е што последиците ние ги живееме од западниот капитализам. Во кој што владее правило на посилниот и во кој што отуѓеноста заемала главен примат во современиот свет, вели Витошевиќ.

Директорот на Националната установа Центар за култура (НУЦК) „Ацо Шопов“-Штип, Никола Ристов вели дека е презадоволен од ангажманот на режисерката и на актерите и очекува голем успех и со оваа претстава.

Во претставата играат актерите Драгана Костадиновска, Милорад Ангелов, Сања Арсовска и Ефтим Трајчов- Ѓаурски, а кои на денешната прес конферернција посочија дека ќе биде вистинско освежување за штипската публика. /МИА

Формула

Верстапен со прва пол-позиција во Мајами

Светскиот шампион во Формула 1, Макс Верстапен за првпат победи на квалификациите во Мајами и ја забележа својата 38-ма пол позиција во кариерата.

Макс успеа да го доближи рекордот на Ален Прост од почетокот на сезоната 1993 година, кога „професорот“ победи во првите 7 квалификации, а Макс сега има шест последователни пол-позиции од почетокот на кампањата.

Макс го обезбеди првото место на стартот со својот прв брз круг во третиот дел од квалификациите, при што ниту еден од водечките возачи не можеше да ги подобри неговите перформанси во вториот обид.

Втор на стартот ќе биде Шарл Леклер со Ферари, а трет неговиот тимски колега Карлос Саинц, кој го дели вториот ред со другиот возач на Ред Бул, Серхио Перез.

Колегите од Мекларен, Ландо Норис и Оскар Пјастри го зазедоа третиот ред, а Џорџ Расел и Луис Хамилтон четвртиот, при што седумкратниот светски шампион го подобри својот пласман во својот последен најбрз круг за да отиде од 10-то на 8-то место.

Топ 10 ги комплетираа Нико Хулкенберг со Хаас и Јуки Цунода со РБ.

Македонија

Честитка од претседателот Пендаровски по повод големиот христијански празник Велигден

Честитка од претседателот Пендаровски по повод големиот христијански празник Воскресение Христово – Велигден.

Претседателот Стево Пендаровски, по повод големиот христијански празник Воскресение Христово – Велигден, упати честитка до поглаварот на Македонската Православна Црква – Охридска Архиепископија, митрополит скопски, архиепископ охридски и македонски и на Јустинијана Прима, г.г. Стефан и сите православни верници, и до претседателот на Црковното претставништво на Евангелско – методистичката црква, Емил Заев и припадниците на Евангелско – методистичката црква во државата.

Почитувани,

Дозволете ми да Ви го честитам најголемиот христијански празник – Велигден со пораката: Христос Воскресна!

Христовото воскресение нѐ ослободува од стравот од смртта, но и нѐ обврзува, наместо пасивни набљудувачи, да бидеме активни учесници во обновата. А тоа ќе го правиме со секој чин на солидарност кон ранливите и грижа за природата, со заложбите за слобода, правда и мир, со борбата за социјална правда и за достоинствен живот на нашите сограѓани. Враќајќи ни ја надежта во општото добро, овој празник нѐ потсетува дека сме си потребни едни на други и дека сме одговорни едни за други. Следејќи го Христовиот пример, да се сплотиме околу визијата за хумано, праведно и просперитетно македонско општество во кое ќе има место за секого бидејќи, секој човек, независно од етничката, верската, јазичната, социјалната, политичката или која било друга припадност – е наш ближен.

Христос воскресна!

Навистина воскресна!

Стево Пендаровски

Македонија

Сообраќајот непречено по наместа влажни коловози

Сообраќајот на државните патишта се одвива непречено, по наместа влажни коловози. Интензитетот на сообраќај на патните правци надвор од градските средини е умерен.

На граничните премини од македонска страна, нема подолги задржувања за влез и излез од државата, соопшти АМСМ.

Се препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Патниот правец Охрид – Ресен, преку националниот парк Галичица од 01.04.2024 е пуштен за сообраќај за сите видови возила со вкупна тежина до 3.5 тони.

Времена измена на режим на сообраќај на регионален пат Р1101 делница Прилеп - Битола заради интезивирање на градежни активности во врска со проект "Санација на трупот на патот кај мост на река Шемница на Државен пат Р1101 км 85+903, делница Прилеп - Битола", и тоа од 27.03.2024 ќе има целосно затворање на делницата.

На 26.03.2024 година од 14.15 часот извршена е времена измена на режимот на сообраќајот на делницата од автопатот 300м после надвозник „Маџари“ до клучка „Белви“ за време на поправка и рехабилитација на државен пат А1/А2 делница Скопје-Куманово (десна коловозна лента) каде што со ветикална сообраќајна сигнализација во должина од 200м сообраќајот се канализира и успорува од левата (за претекнување) сообраќајна лента во средната (за возење) сообраќајна лента за да потоа во должина од 1500м целиот сообраќај ќе се одвива по сообраќајната лента за претекнување (левата), а средната и сообраќајната лента за принудно запирање ќе бидат затворени за сообраќај.

Од 18.03.2024 г. има измена на режимот на сообраќај на државниот пат Р1101, делница Прилеп – Битола, заради интезивирање на градежните активности во врска со проект Санација на патот, кај мост на река Шемница.